"Cvmré kaq Kadø shvngøt lvm"

,"Cvmré kaq Kadø shvngøt lvm" wàwe Kà Vgò taq kèní dvtit dvlé vrāshi mvyø'ng we taq;

Vpøí we pèmè nvmchvngmaq Shvngbè nø vdèce kàta nø vháng vlúnlvm lòng svng shóngwām shà íē. Dvdvmie. Íwe yakà nø,yadø íwe laqya nø vdèce dvpvt vjú ma-vl walòng svng angpè angmèmaqí Vnā shàíè. Angpè angmèmaqí Angcerì vdè nø vdè vlømshi nønt lāvl lòng dø shvngøt dvtú lúnlvm gvzà Vchvk ngè. Venderbilt university kèní 1997 nøng taq dvtøp lúnò wē svng èyà:ngò dvgvp Angpè angmè maqí chá vlē dvrá shv-jvkò nø øpmo we cvmrérì nø, vdè svng vpøshì we nønt mà-vl, vdè svng vlømshi we nønt gø mà-vl wa nø shønò we vlē.

Wervt,cvmrérì svng vdè nø vdè vlømshi nønt lāvl lòng dø shvngøt dvtú lún ràe.wedø íwe cvmrérì nø vsvng nvng vtoq-vtip we taq gø, vrvm vrá we bvnlì taq gø vtu vbóngdø wáshì lúnò wē svng yvnglún shìe. Yàdø íwe cvmrérìò Lvpat taq rvzaq we tiqpvnpvn vl-rà nigø angmaq nø àngmaq we dvhø kèní lutshìlunlvm tvràrì lāshì lù:nò nø Shøl shú shvlá bøn lú:ne wàe.wervt cvmrérì svng vdè nø vdè vlømshi nønt lāvl lòngdø shvngøt dvtú lúnlvm gø gvzà Vchvk ngè .

Vrá nø,"Cvmrérì kaq mà- hvrshìlvm " gø gvzà Vchvk we íē. Angpè angmèmaq nø døngku vdòng tvmu bvnlìrì luqrà dvgvp pàmvshàò we cvmrérì kaq vhvrshàì nø shvmvnā dvhā sháìe. Yàdø angcø angcerì kaq vhvrshì we, mvtvn we, mvde we, kàpù kàcaq shøn we ínø angcerì nønt vhánglvm ,laqya shvlá lvm, tvràrì svng vgámkèòe.angmaqo lvpat yvnggúng dvpvt vjú mvleshì we svng university of Pittsburgh kèní dvtøp lúnò we svng shálún shì we íe.

Vrá nø,(2) nøngtøp dvtøpmò yv'ng kèní yv'ngshì we nø àngcerì kaq vhvrshì nø kàpù kàcaqí shvngøtnò we cvmrérì nø laqya màshvla, laqyàrì gvyaqshìe, we mvdvm dvka dvbúngò we svng yvnglú:nòe. Lvngdøm taq,angmaq gø wedø ni kàpù kàzaq vhvrshì longè.Vrà nø Rvmnvngrì nvng gø shvrvm shvrà mà-shàshì nø shaqcvm lvm vhøm lòngòe wàe. Wervt Vpøí we pèmè nvmchvngmaq vdècerì nønt laqyàrì, vtoq-vtip vzømvzvp we àngdangdang taq vháng vlúnlvm rvt kàpù kàcaq ,mvtvn we ,mvde we ,vhvrshì we kà taq kèní mø-í dø shóngnøntni vjanglaqya shvlá dvtvn nø shvngøt dvtú laqlúnì wvng vrāshi mvyø'è.