"Dvrázaq we lvngpvng vlē cvmrérìò Lvpat"

"Dvrázaq we lvngpvng vlē cvmrérìò Lvpat"

Vpøí we vnvmchvngmaq mvnøklá zaq we dvrá lvngpàng yv'ng cvmrérì svng mvgvrlvm vyáshì ràe. Mvnøkla zaq we dvrá lvngpàng vl-we cvmrérì nø nønt dvt sháòe. Nønt cvm sháòe, wanø nønt dvtøp paqzí vdèrìí dvtøp lúnò we svng yvnglún shìe. Àngmaq lvpat taq nønt shøm lvm mv-ya:ngò. Pàwálvm wanì angmaqí nø angcerì kaq chávle øpmò nø,angshvr bung we pà tiqpvn iní gø vtōshì mà-dvza:ro. Wervt vsvng dvhø dì màzaq shì we, vdè Lvpat svng dvdvm cvm we nønt vlōngè, luq lōngè, wàe. Lvngdøm taq Àngmaq nønt shøm lvm láò sórì mèpvng nø vrù rā pvnrìí we nø', mvløt, gàni cì lvng we svng yvnglún shìe wàe.

Vrá nø, cvmré nīlā taq,cvmrérì svng angpè angmèmaqí yøp rvtø rvwvna lvm gø gvzà Vchvk ngè wàe. Àngmaq yøp mvyø'we rvtø taq sheyø:pmō nìnø gvr mūn we svng yvnglún shìe. Wervt cvmrérì svng rvtø tiqlòng rvwvnashàq vdòng mānmān Shvyø:p lún ràe. Yø:p rvtø mà bóng nìnø Vgō mvcì té we taq cvm sháòe, wàe. Welong nø tiqdvgvp dvpvt cewa mø-í. Àng Tiqlvpat shiqshàn dang svng gvyaqké sháòe. (Zácì zábøp) záyvng rì gø vpo sháòe. Vrá nø, gvzà cvm dvgvp TV yà:ng we cvmrérì vshøm nøng shìni màhøm dvgvp TV yvng kèní cvmrécerì nø kàshøn we taq gø , rvmnvng nvng tiqdø wálvm bvnlì taq gø Shaq cvme. Pàwálvm wanì shvla lòng svng lùshì sháò pàdø màshvla we laqyàrì gø lùshì sháò rvt íe. Wervt rvmnvng svng vkv'm shì we nønt nvng shádøm shì we laqyàrì yvnglún shìe. Vrá nø, Tērérì kaq vpø shálvm rvt gø angpè angmèmaqí gvzà shvngøt ràe. Shaqré kaq vpø shálvm shvngøt dvtú lú:nò we cvmrérì nø gvzà shvlà dø té lù:ng we svng yvnglún shìe.

Tiqmaq angpè angmèmaqí nø vming wā zíò we vlē. Vmíng wa zíò we angpè angmèmaqí nø " welong wá ràe, màwá madaq,mènazvtshì nì, wanø vmíng wa dvjáòe. Pàrvt wá ràe wà long svng tøptøp wà lvjøm mv-pønaò. Wervt cvmrérì nø angpè angmèmaqí dvtú we bvnlì vdvnglvm rvt wā dvzaqshìe. Dvdvmò nø wàò we svng shálún shìe. Shvla we dang svng àng taq kèni yv'ng mv-lunò, vdv'ng kèní vrvme. Ngà jór kèní, ngà mvdàq kèní vrvme wā lvnòe. Pàwálvm wanì Shvlà we mvtúrì svng yv'ng mv-lunò rvt íe. Wervt vsvng rvmnvngrì nvng shvrvm shvrà mà-shàshì we, Vsvng dvgá nvng bvnlì wàwe taq shaqcvm nø shvrvm shvrà mà-shàshì lòng wā cvmrérì nvng singdø kùndvtøp we, paqzizì we shvngkà Karùrì taq kèní shálún shìe. Wervt Shóngshøng we vnvmchvngrì cvmrérì kaq shvngøt dvtú we dang taq vmíng zì we mø-i dø anglvjøm vzvng pønā nø shvngøt dvtú laqlúnì wvng tiqdòngce vrāshi mvyøngè.

Add new comment

3 + 14 =