Dxngku mvshxl

Dèni døngku lvmang taq nø bøngte we vsvngriò lvpat mvshøl kèní nònggwøn zi mvyøngè.

Vshaqpe Winston Churchill nø England móng Wønjichuk keni narshi bøì mèpvng England móng taq bøng gvza shvng we Oxford University keni zongdvtboy taq nònggwøn zi Kà shøn lvm goya:nga.Vshaqpe Winston Churchill Kà shøn daqe wa tao rvt vsvngri gvza køme,wàe. Lìpong rvtø høq atna.lipong shøl shú pei Winston Churchill tvra yvnggung shø:no nø shvgunoe.churchill gø Kà shøn lvm yvng svng di a:mi. Svboy yvng keni vsvng loksokri svng vdaq dang wa dvjaqe.vdaq dang wa vnibaq dvngte dvjaq dá:ngí"Never,never,never give up"(Kadvgvp gø , kadø cha ni gø ,kadvgvp gø nønt me-tin:ni) wa nø shø:noe.vsvng loksok svng vra tiq baq dvjaqe.Weda:ngí vra Tonka ni shø:no da:ngi àng rung ra svng loa:mi, wàe.vsvng loksokngi nø yvngni yvnggung shøn daqoe la:no we wedvngte wa shøn da:ngí rung a:mi rvt vsvngri nønt mv-shøm.Iwe dvda:mo kvt angtøce ínigø vchvkka ída:rì wa dvda:m røn Lu:nga nø àng svng shvgun ya:nga, wàe. Winston Churchill í shøn yanga Ka nø angdongce ie.Iní gø angjøng vchvkka íe.

Vsvng tiqgø nønt dvcvmshì nønt ni etin keni nø pa gø wa mv-bøn. Nønt ni me-tin keni nø (10) Dan denøng mè-ong ni gø nvpnøng mø-i ni, pvngnøng ongdaqe. Bøng shvng we Dvtøp paqzi vde Issasc Newton gø cvm ni la Paqzi cvnshi dvgvp nø ma mv-daq yvng. Vnyaq zvyin taq zvnya:ngi. Bøng shvng we mvkun vru Svra kvbario Svra Bethoven svng gø àng svng shvngøt no we svrapei nø vløm ra me-vl, dvshá me-washi ni vlya:nga.Iwe nønt mv-tin dvzaq shi nø mònggáng taq mvnuq mvnaq shvla we mvkunri Mvn Lun høq mvdàq ya:ngi wàe. Vra mònggáng shvng we Karù tiqbok I we "War and Peace" Karù bok vrù ya:nga pe gø college cvnboy taq mvmè baq vja nø svrarii gø yaqpe nø paqzi cvnshi mv-bøn wa nø mvtchet chaqo nø zong langshi yangi. Iní gø nønt ma-tin dvzaq shi nø mònggáng shvng we Karù vrù ya:nga.

Wervt yadang svng  èyvng lú:ngò dvgvp Kadø iní gø nønt ma-tin lvm gvza vchvknge. Vra, vsvng tiqmaq nø bvnlíri taq tiqbaq labaqce mv bønvm kvt nønt dvcvmshi nø nønt tin weí vdè dvpvt gø vsvng dvpvt gø vjú ma-vl we nø, mvløt,gani nvng dvgapvnrií nønt dvshømshi we vl shaìe. Wervt Vpøí we vnvmchvngri nønt cvmlvm angdangdang vl ra dvgvpì mvdvm taq dvtvnshi bøì we Bøngté rìò lvpat svng gø dvda:m nø nònggùn lù shàì wvng tiqdongce dvmvn we nø yayvng nāròē.