,"Mònggang taq vdá mvgàm vtvng íwe bil gate lvpat mvshøl

,"Mònggang taq vdá mvgàm vtvng íwe bil gate lvpat mvshøl tiqlòng dvshvng lvm íe."

Mònggang taq gvzà vdá mvgàm vtvng íwe Bil gate svng
Mònggang taq nà mvdvm vdá mvgàm vtvng vle mà" wanø vsvng tiqgø í røtnòe. Wekvt àng vtanshi we taq, Ngà mvdvm vdá mvgàm we tiqpè vlē wanø shøn yàngì.

Wekvt Bil gate àngì vhøm yanga we Lvpat mvshøl tiqlòng vkvt dø shønòe.
_ Ngà nø we rvtø taq mà mvgàm yàng. Vsvngí gø mè shá yàng. Tiqni rvtø taq nayuyok shøchøm wáng taq Shvngkà Kàru nàmshì we tiqgø nvng vhøm yàngshà.
_ Ngà nø Shvngkà Kàru tiqlòng wvn shì mvyøngè. Íni gø ngà wvn shì lvm rvtø taq Gvmsùng angshi mà-vl we svng døm bøngà. Vrá nø, Wvn shøng mvyøng nøng gø tøn shøng we í namō gø svng vtvnga yà:ngà.

Ngà taqø Gvmsùng àngshì mà-vl we dang shønòe.
Àngshøn we taq, "Yalòng Shvngkà Kàru svng dvpø màdá zøngè èlushì bø" wanø shønè. Àng taqkèní gø mvdøng mvdaq èzøng nø Shvngkà Kàru svng lu shì yà:ngà.

Vrá nø, Vnī lvban, vshøm lvban dvngtè vlé ráì dvgvp to-dø  shøchøm wáng taq vrá tuq vtu ráì. Shvngkà Kàru Wvn shìlvm Gvmsùng mà-vl. Kàru Shvngkà nàmshì gø í nø Shvngkà Kàru tiqbok svng dvpø màdá zíè.

" Àng shøn we taq Ngà taq dèni gø Gvmsùng àngshì mà-vl yalòng Shvngkà Kàru svng vtoshì mvlúnò wanø vta:nshìe.

" Mv-rà èlushì. Ngaí vmyat lún bøngà. Mvcøm. Dèni nø nām Shvlaè. Wervt dvpø màdá zøngè èlushì bø wanø shønè.
We baq gø dvpø màdá Lu shøng yvngà, wàe.

We mèpvng (19) nøng vlé ráì dvgvp Ngà nø Vsvng mvmèí èsháng we tiqpè, bøngtēng we tiqgø øng daq ngà. Wekvt zvngwà Shvngkà Kàru namō gø svng dvdvmōè. We ni kèní wè pè svng lá pvng yàngà. Tiq shvlá Jvn dvngtè vlé ráì dvgvp ngaí àng svng lá lún yàngà.

" Ngà svng èsháng ngà má? wā røtnòe. Wekvt shá:nge nà Bil gate " mè í má? wa vtvn shìe.

" Vzáng dvgvp Ngà svng Nàí dvpø màdá Shvngkà Kàru èzøng yàngà long dèdàmōè má"? wā røtnòe. 
" Íè, dvdàmōè. Nà svng Vnī baq vpø'màdá zøng yàngà le" wā vtvn shìe.

" Wē rvtø taq, Nàí ngà svng dè bà:ng yv'ng ngà rvt Oqã wvng nø jèjú vtvngshì mvyøngè vloè. Nà lvpat taq rà we vl nìnø èshøn rà.
Ngaí nà èra pvnrì shvngbe svng dvbvng lvm íe" wanø àng svng vlōè.

" Svra pè a, Nàí nø vkvt dø jèjú zíshì yvngà long svng vkvt dø ngaí dvbvng yàngà long svng  vrá tiqkvt vtvngshì lún daqè mè là:nì" wanø Shvngkà Kàru namō gø ngà kaq vtánshìe.

" Pàrvt nø" wvng ngaí røtnòe.

" Ngà nø Dvshàng we Shvngkà Kàru namshú  tiqpè øngà dvgvp
Nà svng ngaí dvbang yàngà. Nà nø vkvt mònggang taq gvzà vdá mvgàm vtvng èí vmì we rvtø taq Ngà svng vrá dvbvng mèyø we íe. Ngàò jèjú svng kadø wā vtángshì èlúnò ni ma?" wa shønè.

" Wē ni kèní ngaí shánønt tiqlòng lún yángà. Shvngkà Kàru svng namshú pè nø ngà mvdvmø téwa vdá mvgàm pè íe. Pàwálvm wani nø àng nø tiqgø gø svng dvbvng lvm dang taq àng vdá mvgàm høqshaq mvcāò lòng íe."

Jøngjøng ni vdá mvgà:mē wà lòng nø ja Gvmsùng vdá mvgàm we mvdvmø téwa vdá mvgàm gø nø Nønt mvshøn vdá mvgàm gø le íe. Yalòng svng Vsvng shvngbeí cíng rál lvm gvzà vchvk we íe, wanø mònggang taq gvzà vdá mvgàm we Bil gate taqkèní vkvt dø shvring yvngà we svng yvnglún shìe.

Add new comment

5 + 1 =