"Mongzøl we Døngku tvrà" wàwe Kà Vgo vdòng døngkupèlaí rírà we mvtúrì(14) dang svng dvshvng lvm íē."

Yà lvban Døngku lvmvng tiqyø taq nø, "Mongzøl we Døngku tvrà" wàwe Kà Vgo vdòng døngkupèlaí rírà we mvtúrì(14) dang svng dvshvng lvm íē."

Døngku wàwe nø bolong tiq mvdò nvng gø vbóngè.Gwín køp taq tiqgø wā mvnshì ma shvla. Vdè nø vdè shvrà taq vl nø ta svng tale dvbang ke weí dvzaq dvgvngshì ràe. Nønt vrá ràe. Nonggùn vrá ràe. Hí vrá ràe. Wekvt wā gønzøp we taq gø byō nø nonggùn vl nø jór lúnlvm vlē walong svng yvnglún shìe.We pàdø Døngku tiqlòng taqgøDøngkpè nvng Døngkumè ta svng shóngnønt vzøm weí vsíng kè ràe. Tāsvng dvbvng kè nø tùbùm kè ràe. Dvzøm kèràe. Døngku bvnlìrì dang vrvm taq vrashi nø shòni gø tiqnønt tiqmvsøn wáshì nø dvzaq dvgvngshì ràe. Vzàng kaq Døngku tvrà vháng vlún lvm bvnlìrì gvsvt vjøn nø rvmvng zøngrì gvlshì lúnràe. Wekvt wā vháng vlún nø Mongzøl we døngku í lúnlvm vlē.

Vrá nø, Døngku shølshú Vgopè taqkèní wā Vshé,Gvmsùng svng wa èláò longì wā gø døngku vdòng taq mv-køm mv-zøp we íe. We pàdø Døngkumè che:p kèní wā bvnlì dang vrvm taq dvzaq dvgvngshì longí wà gø mv-køm mv-zøp walòng svng yvnglún shìe. Døngkupè, Døngkumè nvng chøm Vsvng shvngbe nø nøngnøng vrá dvzaq vrá kvt wa vháng vlún lvm vlē.Wervt Døngku svng Shølshú tiqpèí ríra we mvturi mvmè vl yv'ng kèní tiqmaq dvdit dvlé mvyøng we taq,
(1) Bvnlì tiqlòng svng døngdø ewàò.
(2) Láng vdù we taq shvlá wā èlángò.
(3) Døngku dvpvt vlún dvngtè rvtø èzíò.
(4) Vrū ra pvn byolvm pvnrì taq nà yáshì.
(5) Cvmrérì kaq svng rvtø vlún dvngtè rvtø zí nø nønt shvløm weí shèngøt dètúò.
(6) Vdè góng Vjvng laqya svng døngvng dø èøp shì.
(7) Gvray nvng jèjú àng Kangrì angpè angmèmaq svng nà pøò.
(8) Cíng rálnøt rvmshì lúnlvm lega èrøò.
(9) Shvla lòng nvng mà-shvla lòng svng rvdoq rvwvn rvzvngshì lúnlvm ràe.
(10) Daknønt dvdvmnønt gwà nø, nønt Vjvng laqya shvlá gvlshì lúnlvm ràe.
(11) Døngkumè svng nà pøò.(Vdèí nà pøò kvt wā cvmrérì nvng tiqdvr vsvngí vpø lvm vlē.)
(12) Bvnlì rvt nønt mv-gøl lòng svng vdè chøm taq shvmná me dèháshìnì.
(13) Mvngshér we, nønt shvløm we kà í døngkumèò hí svng èshøqāò. Sherìngò.
(14) Døngkumè kaq dàm zóshì we (a:tvl we ) nvng Kà-pù kà-zaq shøn we vyáshì ràe.

Døngkupè wàwe nø døngkumèò vlømshì ra, dvgøqshì ra ídø tiqdvchá angcø angceri dvpvt shvbóng shvmvtshì ra gø íe. We rvt shóngshøng we vnvmchvngmaq Vjvng laqya shvlá, mvnggárì gvlshì nø Gvray døngku, rvzvngce døngku kaq svng vháng vlún dø dvzaq dvgvngshì laqluni wvng dvmvn nø nonggùn zí mvyøng we Mongkà svng yà yv'ng nāròe.

Shvngbeí Gvray Mongzøl lòng leqlun nøng.