Shiqshvn dø vl lvm.

Shiqshvn dø vl lvm.

Vsvng tiqgø rvtø vrvm shiqshvn dø vl lún lvm dvpvt mvdøng mvdaq vchvk vlrà we nø svn singwe nvmbøng svng cøp lún ràe. Svn singwe tì aq ràe, shìqshvn lvm zílúnò we ám pà vmlún lvm vchvk we íe. Góng shà shò àngàt shìrà we vlràe. Lóloq yupràe. Shiqshvn lvm dang nvng vdù vbóng dø góng gwá bèlaq rì svng gø dvzøp shìnø gwá shà ràe. Rùng we, ripwe dang taq gø jòwe kū vl ràe. Nønt mvcøn svng gø shvlá wa vlshà lvm vchvk we íe. Vsvng tiqgø vsak cún shìnø vllún lvm dvpvt minute, second rvtø vrvm vchvk wenø nvmbøng íe. Vsak nvng góngshà ngàng døng lvm dvpvt góngshà vdùng rvm vlwe shvwè rì shò ngàt vra shìnø vl lúnlvm svng nvmbøng nø gvza tóbum nø dvbv:ngò we íe. Wervt nø shìqshvn lvm dvpvt svn singwe nvmbøng cøp rae wa taq góngshà vdùng rám cøp bøà we nvmbøng nø svn singwe nvmbøng ínìwà shìqshvn nø vjú vlwe ílù: nge. Góngshà vdùng rám vlwe rvshú nø svn singwe nvmbøng taq lúmme oxygen svng wa rà vchvk we íe. We rvtnø svn singwe nvmbøng svng rvtø vràm taq vchvk we íe. Vsvng tiqmaq nø cígwìt we nvmbøng wà yvng vl mvbyò, záyàng angpvn pvn bøn shaè wanø chøm vdúng vl shàe. Svn singwe nvmbøng nø ka dvgvp gø záyàng angpvn pvn bøn dvzvr we màvl. Chøm vdúng taq ka dvgvp gø nvmbøng lún ràwe íe. We rvtnø tiq chøm rap vsvng shángbe shiqshvn wedø vl lúnlvm dvpvt vdè vlwe chøm svng svnsíng we nvmbøng lún lvm dvpvt gvza vchvk we íe.

   Nvmbøng svnsíngwe lún shìwe ínìnø záyàng ziqyàng vl nìgø bvn lún dvzvr ra we íe. Svn singwe nvmbøng shvlá nø shìqshvn lvm dang dvpvt gvza vpø wedø rvtø vrvm yòl wà lún shìwe íe. Nvmbøng shvlá mvlúnò we rìnø shìqshvn we dang taq nà kelvm wà íe. We rvtnø vdè vlwe chøm svng nvmbøng lún dvzvr lvm dø lvjáng rae. Vdè vlwe shvnvng rì taq gø svnsing dø wàò nø nvmbøng shvlá svng cøp lúnò nø góngshà nvng nønt mvcìn mòngzøl shìqshvn we vjú svng lúnlvm dvpvt dvzaq shàì wàng nø dvshvt we íe.