"Tvmømè lvpat mvshøl"

"Tvmømè lvpat mvshøl"

Dèni Shvngkà tiqyø lvmvng taq nø, "Tvmømè lvpat mvshøl" tiqlòng kèní tiqdvtvng dvtit tèlé nø dvshvng weí nonggùn zí mvyøngè.

Vpøí we vnvmchvngmaq Vlāng we cā pvn taqkèní Tvmømè  nø lvpat yv'ng vtvng íe wanø gundvtøp mō we vlē. Àng bat 78 nøng høq cúnshìe, wàe. Íwe bat 48 nøng dvgvp nø àng lvpat taq mvhøt lvm tiqpvn vhø:mòe. Àng vbat 48 nøng høqa:tnò kè angò hìnølrì vpóng nø gvyaq longē.
We rvtø taq gvzà zá vhømòē. Nízì lòng gø gv'ng yv'ng høq yvng daq nø dvgoq longē. Mølrì gø yv'ng daq nø tvt lōng we írvt 
gvzà vlìshì lōngè. 

Wekvt dvshá kvmshì nø zvn dvttut cúnshìlvm í má?, mø-í nìnø shā màlákéshaq vm pà màvmshaq dvshíshì lvm íe má? , wanø rvzvngshìlvm vnī tvrà wā vlē. Wedø ílong kvt gvzà vháng we shìgùng tiqyvng svng Vlāng nø wē yv'ng dv'ng wàshì nø 150 ni høqshaq nàrshìe, wàe. Weyv'ng angò nízì lòng lú:ngì vchaqshì nø lùòe. Nízì àng shvr tiqlòng yō lòng høqshaq weyv'ng cāòē, wàe. Àng shvr yō lòng we nízì lù:ngí  dē nø gā ráì we hìnølrì svng tiqlòng mèpvng tiqlòng rá:nòe. Hìnølrì rvn dv'ng bøò mèpvng àng mølrì tiqgøm mèpvng tiqgøm rá:nòē. Møl angshvr yō lònghøqshaq nø 150 ni vléē, wàe. 

Wē mèpvng wā Vlāng lòng nø 30 nøng dvngtè zvn dvttut cúnshì longē. Wekvt àng vbat nø 78 nøng høq bøā. Yalòng Tvmømè lvpat mvshøl taqkèní  Vsvng kaq svng gø shvngøt dvtú nø shvdømè.

Nøngmaq lvpat taq gø Tvmømè dø tiqkvt kvt rvzaq we nønt rvtshìlvm rvtørì vl longē. Nøngmaq lvpat svng vháng dø, zvndvttut shvla dø dí lúnlvm rvt nøngmaq lvpat taq gø zālvm, mvhøtlvm rì, tønshìlvm rì, gwørlvmrì vlē.  Tvmømè gò dø vdè góng taqkèní mà-shvlarì ,egū:rò kvt wā vdè lvpat taq gø tiqkvt vrá nønt shøm dvbù nø cúnshì lúnlvm ílongè. Nønt dècv'mshì nø nønt edvt kèní nø lvpat tø nø shìlvm lòng svng cāshì weò vbóngē, wàe.
Nøngmaq basha vsvngrì nø Gvray yv'ng kèní vpø dø, ringdø, zit-nønt, shánønt vpá:n  we , Shansher we pvlace kømpaq jèjúrì vzíshaq,vlún shaqrì íshàe.
 Wervt shongshøng we vnvmchvngmaq nøngmaq lvpat taq gø mvmvng mvshé nø vrū ra we vmlvm,aqlvm pvnrì, mà-shvla we nønt vjang laqya ànglírì svng gwør nø vléshì we mv-rà rì vchvngshì weí Vkangpè vdòngø shagóng nønt mvsøn angshvr wáshì nø nonggùn kūngà lùshì ràe. Wekvt vdè lvpat taq gøngzøl nø nønt shøm lúnlvm ílongè.