Lòngzàpè Yesu ò shv̀nshérwe vsv̀ng Therese (Chø̀myo vjø̀ngmè)

Lòngzàpè Yesu ò shv̀nshérwe vsv̀ng Therese (Chø̀myo vjø̀ngmè)

Gvray dvbùshvng mòngkà dvshvngwe vsvngrì kaq roqgvrā we shvnshér vsvng tiqmè íwe St. Therese nø France móngdàn Alancon myuqtaq AD 1873 nǿng taq shøqyv̀:ngà. Àng cv̀mlvpat íyv̀ngì we AD 1886 nǿng Christmas bóy vtoò we àngni taq àngkaq svng lòngzàcèpè Yesuí àng yv́ngsvng shø̀ngran zíò we yv́ngkèní Gvray bv̀nlì taq apnúngshì lv́m nøt ratshì ráìwe gø íe.

St. Therese àng lvpat 15 nǿng taq Svrabín koqkámpè ò vmíng vkáng ( Papal dispensation ) kèní Lisieux taq vlwe Gamelite sister zùng sv̀ng gòng yv̀:ngì. Àngtaqkèní kadvgvpgø kám vlǿmshìwe nø “dvsháza shóngnøt kèníwa Gvray àngò shóngnøt svng vrá dvzøm lúnshìe” wanø kámwe gø íe.

Àngnø weshvrà taq Gvray paqzí svng cvnshìwe rvtø̀ taq bangmvnǿcè vlnø̀ kàtawe, vlǿmvm vrvmwe tiqgǿ gø íyv̀:ngì. Àngnø nivrv̀mò lvpat svng Gvray mòngkà røwe, cvnshìwe tvrà taqkèní pvlàcè lvpat vlǿmrà lashìnø̀ yaklv́m shìwvtrì svng gø vle lúnò we íe.

St. Therese nø we àngmaqò Sister zùngò shølshú vgo tiqgǿ vya svng kámshì lúnbǿà we mèpvngnø we zùngò zùngmàcèrì kaqsvng nònggøpkà taqkèní gø, chvpdvp laqyàrì taqkèní gø shvlá vtang shvngøt dvtú lún yv̀:ngà we íe. Àngí vru yv̀:ngà we pvlàcè mvshøl ( The History of a (Soul) wawe pvlacè dang vru yv̀:ngà we kàru bok taq “ ngà nø Gvray kaqsvng cv́m vtang dvtàng kèní dvzøm shàì wewa íshàe" wanø̀ vru yv̀:ngà.

St. Therese nø kámnøt tvrà shvngø̀mré dvpvt shvre tiqgǿ íyv̀:ngì nø̀ we tvrà svng shvkse wáshì lv́m dvpvt àngò lvpat svng pvlacè chutchángwe vkáng kèníwa shvngø̀mré vháng lúnlv́m íwe dang taq apnúng dvzaqshì yv̀:ngì we íe.

Àngshø̀n yv̀:ngì wetaq " ngànø St. Agnes ò laqyàrì svng lún mvyǿ:nge" wanø̀ vtàn yv̀:ngì. welòng nø dvdam nøtkèní gø dvdam mvrǿnshìwe shóngnøt tiqlòng ni íràlonge wanø vtàn yv̀:ngà. St. Therese nø AD 1897 nǿng àng lvpat 24 nǿng taqni lvpat béyà:ngì. Gvray dvbùshvng bv̀nlì taq vjúrøt dvzaqshìwe nvng àngò chvpdvp bv̀nlìrì nø vzø̀mwe ínø̀ St. Francis Xavier døni wángzà móngrì taq Gvray dvbùshvng bv̀nlì wawe vsvngrì kaq roqgvrā we shàshér vsv̀ng wanø St. Therese kaqsvng mvsat ráà we íe.

St. Therese àngshø̀n yà:ngì we taq shvngø̀mré wawe tø̀ngnø yalòngnø àng dvtàng tàng, àngciq ciqrì taqkèní vrang shaq íe wae. welòng taq shóngnøt svmi vsorwe nvrø̀m tiqlònggø vbáwe íe. yadangrì shvngbe nø shvngø̀mré vsv̀ngrì ò àngmaqí wàò we bv̀nlìrì taqkèní yánglún, shálúnshìwe gø íe.

weratnø̀ la welòng svmi vmaqvm we ínìnø dvzv́r rìí gø wedø dvbùshv̀ng mòngkàrì dvshvnglv́m mv-vl yàng. wedøni kámnøt shvrerìò shvwirì, mvshǿlrì dang svnggø shø̀n lv́m mv-vl long wanø dvkám ráà we íe.