Muqlàng dvzv́r Mikael nvng Gabriel

Muqlàng dvzv́r Mikael nvng Gabriel

Pvlàcè lvpat ku vlwe muqlàng dvzv́r rìnø mònggv̀n rvgaq yachàng shi mv-vl dvgvp kèní gvray nvng tiqdø v-vl shaq ínø̀ gvray í vháng vtang zìdang ku pv́nmv́n yv̀ngà we íe.

Àngmaq nø shagóng mv-vl we ínø̀ shìwe mv-vl dvciq lvpat gønshaq pvlàcè rì ni íe. Àngmaq ò bv̀nlìrì shvngbe nø gvray yv́ngkèní dvkám we bv̀nlìrì taq dvzømshì we rìni íe.

Gvray nvng vbóngwe wanø lvjøm lúnshìwe bø̀ngtǿshì gø muqlàng dvzv́r Michael nø ngànshà rì sv̀ng gvsat lv́m døngjá vlwe ínø̀ gvray ò vmíng vkáng sv̀ng tøl mvyǿnø̀ dvløt we Lucifel kaqsv̀ng muqlàng móngdàn kèní lù:ng yv̀:ngà wegø íe. We dvgvp muqlàng móngdàn dàn taq mvjàn gvbà bø̀n yv̀ngì wegø íe. Muqlàng dvzv́r Michael nv̀ng àngò dvzv́r shúrì nø bø̀rìn nv̀ng mvjàn gvsat we vl yv̀ngì. Wedang nvng singnø̀ dvtan lèga 12:7-8 taq Muqlàng ram nø cìl vshvt we bung lú:ngì. Mikael nvng ang dvzv́r rì nø, Bø̀rin go nvng vshvt lú:ngì kvt Bø̀rin nvng ang dvzv́r rì gø cìl vshvtlv́m búng ráì. f 8 Inìgø Bø̀rin goí mvdv́ngke bǿà nø muqlàng ram gø ang dvpvt v́lrà màv́laá:mà. Wanø vru yv̀ngà we svng yv́nglún shìe.

Muqlàng dvzv́r Mikael í nø nøngmaq nv̀ng satan rì gvsat lú:ngì dvgvp kadvgvp gø nøngmaq lvpkèní dvbangshì nø èroq ègvr:ì wegø íe. Dvtan 20:10 cángpè nø mònggv̀n vlewe nitaq mvjàn cǿmlv́m íwe dang Vsvng kaq yù:mò we cáng koqkv́m pè svng nø, zø̀mnaq nvng mvdø̀ng mvman we kàdvtutshú pè gur bǿà we gàn svmi tìdøm vdòng svng gur bǿòe. Angmaq nø weyv́ngø vyáng yaqdø̀ng dvcìq lvpat dvshà mvhøt longe. Wanø yv́nglún shìe.

Muqlàng dvzv́r Gabriel nø gvray ò vháng vtang vmíng, āna svng vrìng lv́m dvpvt dvkám shaq íe. Àngtaqkèní chø̀myo vjø̀ng Mari kaqsvng dinø̀ Yesu gvl lv́m dang gø dvtá yv̀:ngà. Wedang svng Marií, “ngà nø lvngàré nvng gø shini màshóngshø̀ng ke, kadøwa yalòng lvbø̀n daqni? A:lòe. Wekvt Muqlàng dvzv́r Gabriel í kadø íe wani gvrayí wá mvlú:nò we pà gø màvl,” a:lòe.

Muqlàng dvzv́r Gabriel ínø Gvray dvbùshv̀ng mòngkà dvshv:ngò we vsv̀ngrì kaq tubùm dvbangā we nvng shøngran yøpnv́ngrì vmvng nø nøt datlv́m vhǿ:mì we nøngmaq kaqsv̀ng dèba:ngì we íe.

Mulàng dvzv́r Rahpael (Gvray ò cì svra pè) nø pvlàcè nvng shagóng mvshiqshàn we tvrà rìtaq shvzǿmā lv́m dvkám shaqpè gø íe. Muqlàng dvzv́r Gabriel gø muqlàng taqlvpø vlwe Gvray àngò muqlàng dvzv́r rì 7 gø kèní tiqgø íwe íe.