Noqngøm tøngnø taq Yesu shvrungo we

Lòngzàpè Yesu kaq ngoqngø̀m tø̀ngnø svng dvgòngò we

Dèni taqnø shvngø̀mré mvshǿl, vtóng taq vlwe dø tiq dvchá Àngmè Mari nø Jeruslem svng dinø̀ lòngzàpè Yesu svng dvta:nò we póy àngni íe. Moshi dvrá svng cv̀nnø̀ lòngzàpè Yesu gv̀l bǿà mèpvng (40) ni gømvm kvt noqngø̀m tø̀ngnø svng dvgò:ngò we bv̀nlì svng wàvtnà we ínø̀ kaø vní go svng gø shvrúngā òe. Kà dvtutshú rì ò kà svng dvgøm lv́m dvpvt shvrú:ngò we dang Luka 2:32-38 taq àng nø wv́ngzà rì svng vwanalv́m gálòng í nø, nà bashà Israel dvcì ngø̀rdvgùng gø ang ni íe, wae.

Yesu dang shø̀:nøò kàrì rvtnø, àngpe àngmèní nø dádv̀ng wae. Simeoní angmaq svng shvmán dvgǿ:ngò nø angmè Mari svng a:lò we nø, Eyà:ngo, cv̀mré yapè nø Israel dvcì cèrì taq, mvme gǿ vtv́llv́m dvpvt gø, mvme gǿ kungshìlv́m dvpvt gø, vrá vsvng vbønshilv́m mvshv́lpvrá gø ílv́m dvpvt rvhiqshaw pè íe.

vrá mvme gǿ nøt taq dvda:mò rì dvtánalv́m dvpvt rvtnø nà dòngnøt svng gø shv̀m mvsǿ:rí yaqò dø èyaqvtne, a:lòe.

vrá Yasher dvcè panuel àngcè mè í we kàdvtutshú, Anna tǿò we shaqré tiqmè vle. Ang nø shvzøngshi bǿì mèpvng shvngøt nǿng vl dá:ngí ang chø̀mpè shì nø, vshvtcé vbì nǿng høqa:tnà we memà tiq mè íe. Ang nø noqngø̀m tø̀ngnø kèní màléshìshaq, v́mpà gø màv́mv́m vnatshi nø júrø:tnò weí vráng yaqdø̀ng Gvray kaq dvzø:mò we tiq mè íe.

Wervtø̀ taqni ang gø weyv́ng gòng lú:ngì nø, Gvray kaq oqà wa taqsórí, Yerusalem rì chutchv́ng daqò we svng nøt vlǿmshì nø ca dáò rì í dv́ngte kaq cv̀mré gǿ dang shǿn ma:nòe" wanø vru shaq íwe dang yv́ng lún shìe. Yudá dvcì rì ò vtóng vlwe dø tiqdvchá cv̀mrépè ò àngmè shvmá:n dvgǿ:ngò we nvng dèni bat shvngø̀mré vtóng nvng gø vdu vbóng ráì wedang yv́ng lúnshì wegø íe.

Dèni bat shvngø̀mré vdòng taq gø cv̀mré gǿ svng tìløp kámā we nvng àngmè svng vjúrøt shvmánā we wáshàì we íe.

AD 526 nǿng Justina (I) bat taq nv̀msvr móngdànrì svng Constantinopu kùlwàng svng Lòngzà pè Yesu svng noqngø̀m tø̀ngnø taq dvgò:ngò nø shvrúngò we bóy svng wàlv́m dvkám yv̀ngà wegø íe.

11 àngyá mvzaq nǿngrì svng tuqráì wekvt nø svmi tvróng svng shvmá:nò we vtóng svng wápv́ng shì ráì. Welòng svng Missa (svmi) wanø tǿshì ráì.

Greek vtóng, mvshǿl rì taq àngmè Mari nvng Anna maq taqkèní noqngø̀m tø̀ngnø taq shvrúngò we dang vtán wegø íe.