St. Anne (Mari àngmè) nvng St. Joachim (Mari àngpè)

St. Anne (Mari àngmè) nvng St. Joachim (Mari àngpè)
Mari ò àngpè ní àngmè bø̀ng svng Gvray shv̀nshér kàru taq vru yv̀:ngà we mvyángshì. Ínìgø shvngø̀mré mvshǿl, darì vtóngrì taqkèní Mari àngmè nø (Anna or Hanah= Grace) jejú ìshøt nvng àngpè Joachim wanø̀ vtànò we íe. Àngní ò àngcèmè svng nø (Mariam-Mary) Mari wanø tǿòe. Mary-Mari wawe ò àng lvjøm nø Gvray kaq vjúrøt kàrì svng táāò we wanø̀ lvjøm lúnshì we svng gø shálún shìe.

4 àngyá mvzuq nǿng vdòng taq kèní Yesu Kristu ò àngcì Mari ò àngmè kaqsvng shvgùn shvring we tìyø lvmangrì nv̀msvr móngdàn rì taq bø̀ngshvng lúngì wegø íe. 
AD 1548 nǿng høqshaq Catholic shvngø̀mré vdòng bóy àngni ku mvsat shìwe mv-vl yàng. St. Anna kaq svng nø Brithine nvng Canada móngdànrì taq dvgùng shvringwe wá pv́ngshì ráì wegø íe. Àngò hang cø̀mla vlwe rì taq gvzà bø̀ngshv̀ng yv̀:ngì wegø íe. Welòng nø cv̀mré góng àngmèrì dvpvt cv̀mré vbunshì we rvtø̀ rì taq vlǿmrà tiqlòng ku bø̀nráì wegø íe. 
St. Jochim nø Mari ò àngpè íe. Ínìgø Gvray shv̀nshér kàru rì taq àngò mvshǿl rì vru yv̀ngà we mvyángshì. Jochim svng Yahweh í tvlú dvgø̀ò we wanø lvjøm lúnshì wegø íe. 
Shvngø̀mré mvshǿl rì taq rvcángcèrì í mvlángò we jø̀mciq tiqmaq taq àngò mvshǿl rì gø yv́nglún shìe wanø shálún shìe.

St. Jochim àngmaqnø Gvlile wamà kèní tuqráì nø Jerusalem taq lvpat béyv̀:ngì wanø vru yv̀ngà. 
St. Helena nø St. Jochim nvng St. Anna kaqsvng vpǿ shvringò we ku noqngø̀m tø̀ngnø tiqlòng svng gø vrang yv̀:ngà. We shvrà taq àngní ò dvgàm svng dvgùng shvringò we ku kèní 9 àngyá mvzuq nǿng høqshaq gv̀l yv̀:ngà.

We mèpvng nø we noqngø̀m tø̀ngnø nø Muslim rì ò Bvli ku bø̀n yv̀:ngì. AD 1889 nǿng svng tuqráì wekvt nø darì vtóng vlwe dø tiqdvcháni Yesu Kristu cv̀mrécè ò chø̀m svng vrá dvcøp shvnvp ráà wegø íe. 
St. Jochim ò bóy àngni nø darì kám vsv̀ng shvngø̀mré rì dvhø̀ taq gvzà bø̀ngshv̀ngwe bóy àngni tiqlòng gø íyv̀:ngì. 15 àngyá mvzuq nǿngrì mèpvng kaqnø shvngø̀mré vdòng taq bø̀ngshv̀ng ráì wegø íe.