St. Augustine of Hippo

St. Augustine of Hippo

St. Augustine nø nøt vwángshì nø kámnøt tvrà taq dvzaq dvkángshì ráì wedang svng St. Monica ò lvpat mvshǿl taqkèní gø shálún shìe. Àngnø lvpat (33) nǿng taq kámnøt tvrà wawe gálòng svng vtoshì lún ráà we tiqgǿ gø íe. Làngdø̀m taq àng taqkèní Yesu Kristu ò døngmvn we chutcháng tvrà svng yv́nglún bǿà wekvt nøt mvsø̀n cø̀msaqwe nvng pvlàcè kù:ngà vtoshì lún ráà weí àngmè St. Monica døni lvpat cúnshì lv́m dang svng rvcangshì yv̀ngì we íe.

St. Augustine nø àngmè nvng àngcè pè shìbǿì mèpvng Tagaste myuq kaq lonø̀ we shvrà taq shvrúngshú dòraq mvdò zùng tiqlòng svng vrang yàngà. Wervt dvshà mvhøt we tvrà svng vjúrøt shìwe, kàru shøprì cvnshì we taqkèní dvshà vsv̀ngrì dvhø̀ taq chvpdvp àngmaq nvng tiqdø vlnø̀ vjúlu shìwe bv̀nlì rì taqkèní dvzømshì yv̀ngì. Wemè pvng 3 nǿng vlé ráì wekvt àngnø shvrúngshú vya svng kámshì yv̀ngì. Àngò Svrado pè taqkèní gø àngkaq svng Africa dan taq dvbùshv̀ng mòngkà dvshvnglv́m dvkám ráà we íe.

St. Augustine àng lvpat 42 nǿng taqnø Hippo myuqò Svrado tiqgǿ ku v́l vdu yv̀ngì. Wemèpvng 12 nǿng høqshaq shvngø̀mré dvpvt bv̀nlì wá dvzaq shì yv̀ngì wegø íe. Àngnø shvrúng shú rvmnvng rì nvng tiqdø vl nø̀ mòngkà dvshvng we dang taqgø gvzà bø̀ngshv̀ng we tiqgǿ gø íyv̀ngì.

Àngtaqkèní shvngø̀mré kaq svng vtù we vsv̀ngrì, ngànshàrì wur taqkèní gø shvngø̀mré kaqsvng kupgvr we tiqgǿ gø íe. Àngnò vjúrì shvngbe svng gurò nø̀ Gvray ò dvsháza shóngnøt tvrà taq svkse wáshì ráì we tiqgø gø íe. Shvngø̀mré vsv̀ngrì kaq pvlàcè kùngà banā we, tvrà vmv̀n we vsv̀ngrì kaq tvrà dvtanā we nvng ngànshà rì kaqsvng gø shóngnøt dvtanā we tvrà taq dvzaqshì we tiqgǿ gø íe.

Àngò cv̀m lvpat svng síngsháshì nø̀ cipshì we nøt mvsø̀n gv́lshì we tiqgǿ gø íe. St. Augustine taqkèní Gvray kaq ngàò mvsø̀n nvrø̀m nà elushì, ngàò nvrø̀m svng mèkokāngà welòng svng ngà vshuqpè taqkèní vcúng mvlúnò, wurkáng tvrà svng dètanā ngà wetaqkèní ngà nøt tiqgóng svng zíshì lúnlv́m ílonge wanø̀ vtàn ráà we íe.

St. Augustine nø nøtcun paqzí vdè tiqgǿ gø ínø̀ Theology nvng Philosophy paqzí dang taq gø gvzà bø̀ngshv̀ng we tiqgǿ gø íe. Àngnø Gvrayò ìshøt jejú svng chvpdvp vtoshì lúnò vsv̀ng tiqgø ku dvdut shìwe ínø̀ àngò lvpat vlíng vpo we tvrà kèní gø wedang svng yv́nglún shìwe gø íe. Gvrayò móngdàn dvpat bv̀nlì dvzaq dvkángshì we tiqgǿ gø íe.

St. Augustine nø àng lvpat 76 nǿng taq lvpat béyv̀:ngì nø Hippo myuq taqni àngò shagóng svng rvda yv̀:ngà. St. Augustine àngkaq svng Gvray paqzí vdè rì, kàru mv́nshúrì, shvlaq køtvmwe vsv̀ngrì nvng vne za vsv̀ngrì kaq roqgvr we shv̀nshér vsv̀ng wanø vlǿmshì we shv̀nshér vsv̀ng tiqgǿ ku mvsat shì yv̀:ngì. 8 àngyá mvzuq nǿngrì taq St. Augustine àngò shagóng vnv̀ng svng Baviyá taq dvtan we wàyv̀ngà.