St. Benedict (Bishop)

St. Benedict (Bishop)

January 12
St. Benedict nø Ingloactsone dvcì taqkèní dvgùng vlwe tiqgǿ íyv̀ngì nø àngò cv̀m lvpat taq koqkám kó taq v̀l yv̀ngì wegø íe. AD 653 nǿng taq St. wífred nvng Roma svng dinø̀ vriq yv̀ngà wegø íe. Weyv́ng kèní lo ráì wekvt Notupre taq Roma dvrá svng láng lv́m vjø̀n yv̀:ngà.
Celtito dvrá svng láng shì we tvrà svng mvshóng wámshì lú:ngì. Wemèpvng 12 nǿng vle bǿì wekvt Roma svng vrá tiqkvt vtángá:mì mèpvng nø àng tiqgǿ wa Benedict shvrúngshú mvdò svng gòng yv̀ngì nø̀ Lorine myu taq 3 nǿng døp rúng yv̀:ngì.
St. Benedict nø Cantaburi taq vlwe St. Peter shvrúngshú zùng ò shølshú vgo tiqgǿ bø̀n ráì wegø íe. AD 675 nǿng tuqráì wekvt Waymo taqø shvrúngshú zùng tiqlòng svng vrá vrang yv̀:ngà. We shvrúngshú zùng shvrà svng nø Notupre gàmzø̀ koqkámpè í vlu zíò we shvrà tiq shvrà gø íe.
7 nǿng vle ráì wekvt St. Paul zùng taq vrá rúng vdu yv̀:ngì. St. Benedict nø 5 boq waboq Roma svng dinø̀ shvrúngshú zùng dvpvt ràwe kàru rì svng lù yv̀:ngà. Roma taqø vlwe dvgvp shø̀ngni Music paqzí svng gø cvnshì yv̀:ngì we íe.
Àngò vbat taq England móngø nv̀mlat lóngí vrang shì nø jv̀mna bángkà rvmø we noqngø̀m tø̀ngnø svng France rvmø svrà taqkèní vrang ráà wegø íe.
St. Benedict nø AD 697 nǿng January 12 Waymo shvrúng shú zùng taqni lvpat béyv̀:ngì. Àngtaqkèní vrang ráà we shvrúngshú zùngrì nø 200 nǿng døp gvzà bø̀ng shv̀ng ráì wegø íe.