St. Callistus I

St. Callistus I

St. Callistus I nø Roma myuq taq vshuq tiqgǿ íyv̀:ngì wegø íe. Àngnø àngkàngpè íwe mvgàmpè ò pø̀ gv̀msùng vmvng we tiq rvtø̀ taq àngnø vtang kèní svre bǿìwe ínø we shvrà kèní vtshì yv̀:ngì wegø íe.

Wedø vtshì we tvrà taqni Astia myuqò shø̀tø̀m taqø tvpkéò we vhǿ:m yv̀:ngà. Weyv́ng kèní St. Callistus I àngkaq svng Sadinium bv̀nlì wàngsvng sháò nø dàm zíò we vhǿm yv̀ngà.

Wemèpv̀ng Gv̀mzø̀ koqkámpè Conmodes ò rv̀mnvng tiqgǿ íwe Matial ò røtnímā we vdòng taq we bv̀nlìwàng kèní lutshì lún yv̀ngà wegø íe.

St. Callistus I nø AD 199 nǿng taq shvrúngshú pongtó vya svng Svrabín koqkámpè Zafrinus ò wurta kámshì yv̀ngì we ínø Abian tvrà shvnvngø vlwe dvgàm cúngshú tiqgǿ ku bv̀nlì dvzømshì yv̀ngì we íe.

St. Callistus ò rvgaq vdòng dvgàm wanø dèni høqshaq bø̀ngshv̀ngwe we shvrà nø Svrabín koqkám rìò dvgàm bø̀nráì nø we shvrànø shvngø̀mré kèní nv̀mlat vcùng ráà we dvgàm shvrà tiqlòng gø íráì.

Aposgate myuqò gàmzø̀ koqkámpè íwe Julian taqkèní gø cø̀mlahang noqwe shvrúngshú rì kaqsvng dvkámnø shvdǿmwe shvri kàru taq “ rvcángcèrì nø tiqdá vsvngrì mvdàmø àngmaqò dvsháza shóngnøt gv́lshì wenvng shìvm we vsvngrì ò shagóng vnv̀ngrì kaqsvnggø vpǿnø shvláwa kǿ:māò werat bø̀ngshv̀ngwe gø íe” wanø dvkám yv̀ngà.

St. Callistus nø AD 217 nǿngtaq Svrabín koqkámpè vya svng kámshì lún yv̀:ngà nø wemèpvng nø cáng noqwe vtóngrì kaqsvng vgám nø gvsat yv̀ngà wegø íe. Àngtaqkèní vsvng tiqdá rìò svma dvchvpwe nvng vsvng shatwe rì nvng dvgá mvrà gvbà vlé bǿò we vsvngrì kaq mvrà chutāwe vtóng svng láng pv̀ng ráà wegø íe.

AD 222 nǿng taqnø St. Callistus kaqsvng kámnøt tvrà nvng singnø shatnò we vhǿm yv̀ngà werat àngnø kámnøt shvre tiqgø íe wanø mvsat shì wegø íe. St. Callistus I àngkaq svng Arium tvrà shvnvngø rvdanø kǿm yàngà wegø íe.