St. Damasus I Pope Confessor

St. Damasus I Pope Confessor

St. Damasus nø Roma myuq kèní Spain dvcì tiqrvp cè ínø̀ AD 366 nǿng Svrabín koqkámpè St. Lily Rius ò vya svng dvtut kámshì lv́m rvcā:ngò we vhǿm yv̀ngà. Ínìgø vtù gvzàmwe ngànshà tiq mvdò taqkèní Ursucinus kaq Anti-Pope Svrabín koqkám pè svng vtù we vsv̀ng wanø̀ mvsat ò we vhǿm yv̀ngà. Àngnø Gàmzø̀ koqkámpè Valentinian ò móngdàn vtáng svng lùngò we 2 boq vhǿm vhǿm ò we ínìgø noqngø̀m tø̀ngnø ò mòngzø̀l we tvrà svng 12 nǿng naq høq vtù vrè we svng vhǿm yv̀ngà. St. Jerome í dvtú ráà we taq St. Damasus nø mvrà shèr we noqngø̀m tø̀ngnø ò dòngnøt mvsø̀n shèr we cì svrawon tiqgǿ íwe dang dvtú ráà wegø íe.

Àngnø kámnøt tvrà ò dvgùng vlwe nvng dvshà vsv̀ngrì kaq shóngshì we nøt mvsø̀n rìrvt gvzà bø̀ngshvng we tiqgǿ gø íe. Àngò bat taq shvngø̀mré ò dvgùng gùngshv̀ng svnggø dvhàng ráà we tiqgǿ gø íe. Àngtaq kèní dvkám we taq shvngø̀mré mè nø council ò vmíng āna lv̀mpvngø vl we mǿí nø Yesu kristu ò mòngkà taq mvngu shìwe dang dvkám ráà wegø íe.

St. Damasus nø Constantinopel shvrúngshú vgo ò tvrà shøl we vdòng vmíng āna rì svng dvtøp lv́m dvpvt nv̀msvr Illyricum svng dvzv́r tiqgǿ svn dvzv́r yv̀ngà. Àngtaqkèní mèmà rì nvng dvrvtcèrì yv́ngkèní kuya gúnvm we tvrà svng mvwà lv́m vgám ráà wegø íe. Vrá nø shìwvt dvcøp we bv̀nlì rì shvngbe nø Svrabín koqkámpè ò wur taq vlwe vmíng svng gø gv̀l ráà wegø íe.

St. Damasus àngò bat taq St. Jerome gø Roma taq v́l vdu yv̀ngì wegø íe. St. Jerome gø Svrabín koqkámpè ò bv̀nlì àngkàng ku tiq dvgvp we shvrà taqø v́l vdu yv̀ngì. Svrabín koqkámpè taqkèní gø St. Damasus kaq svng Gvray shv̀nshér kàru svng Latin dvcì kà ku kàku língnø̀ vru lv́m bv̀nlì døngjá zí yv̀ngà.

Àngò kámnøt shvre rì dvhø̀ bø̀ngshvng we tvrà taqkèní rvgaq vdòng dvgàm gùlwàng svng gø góng lúnwe vko vkáng svng vtoshì lúnò wegø íe. Àngtaqkèní vru shøp ráà we kàru shøprì nø dèni bat høq shaq shvngø̀mré mè dvhø̀ vshøp ráì wegø íe. Àngtaqkèní kámnøt tvrà vjúrøt tvyø rì svng vrá dvcøp dvtøp nø téwa shvla vtok dø rvmø ráà wervt àngkaq svng shvngø̀mré mèò àngkàng tiqgǿ wanø̀ gø bø̀ng shv̀ng ráì wegø íe.