St. Frances Xavier Cabrini

St. Frances Xavier Cabrini

Tiqrvwá kèní dvgá tiqrvgaq svng yv̀mbv̀n bv̀nwe vsv̀ngrì kaq kupgvrwe St. Frances Xavier Cabrini nø Italy móngdàn Sant Angelo Lidigiano rvgaq AD 1850 nǿngtaq shøq yv̀:ngà. Àngnø cv̀m lvpat taq Gvray bv̀nlì wàlv́m Sister zùng mvmè sv̀ng gònglv́m shúnshìwe ínìgø mvlún yv̀:ngò. Pàwálv́m wani àngnø cv̀mlvpat taq shagóng shiqshàn tvrà mv-vl we tiqgǿ íyv̀ngì werat we vkángrì svng vtoshì mvlún yv̀ngò wegø íe.

Weratnø AD 1877 nǿng taqnø Lodigiano wamà taq vl-we svradopè taqkèní dvtú dø tiqdvchá àngkaqsv̀ng kamvdò kèní gø màtoò werat àngtaqkèní àngmvdò tiqlòng sv̀ng poqpv́ng shvlawe dang taq dvzaq pv́ngshì ráì we íe.

We rvtø̀ kèní “Jà nvrø̀m dvpvt dvbùshvng mvdò” ( The Congregation of the Missinary Sisters of the Sacred Heart) wawe mvdò sv̀ng Codogno, Milan and Rome myuqrì taq poqpv̀ng yv̀ngà.

10 nǿng vle bǿì mèpvng St. Frances Xavier Cabrini kaqsvng Svrabín koqkámpè Leo 13 taqkèní dvtúwe døtiqdvchá America dan sv̀ng dìlv́m dvkám yv̀ngà. Àngtaqkèní American móngdàn svng tuqrawe Italy vsv̀ngrì nvng tiqdø bv̀nlì wàlv́m we móngsv̀ng dvzv́r yv̀ngà wegø íe.

NewYork myuq svng tuqráì wekvt weyv́ngø rungwe Svradopè taqkèní àngkaqsvng vrá vtánglv́m dvká:moe. Ínìgø St. Frances Xavier Cabrini àngtaqkèní àngnø Svrabín koqkámpèí dvzv́r shaqíwe dang nvng we shvrà taqøni vl lv́m íwe dang vtàn yv̀ngà.

St. Frances Xavier Cabrini àng weyv́ngø vlwe rvtø̀ àngdongcè vdong taqni àngtaqkèní Sister zùngrì, cìróngrì nvng dvratcèrì dvpvt zùngrì poqpv̀ng lún yv̀ngà wegø íe. St. Frances Xavier Cabrini àngnø English kà sv̀ng shǿn mvsháò we tiqgǿ ínìgø kadøíwe shìwvtrì dvhø̀ taq ínìgø àngò manggá sv̀ng jór lúnhøq dvzaq dvkángshì yv̀ngì we íe.

Wewa mvtaq American móng svng lorawe wángzà dvcìrì, yv̀mbv̀n vsvngrì kaq svnggø Gvray dvbùshv̀ng bv̀nlì taqkèní shvngbe svng mvkok nø roqgvr yv̀ngà we íe. Mother St. Frances Xavier Cabrini nø AD 1917 nøng taq lvpat béyv̀ngì nø àngò shagóng vnàng svng nø NewYork taq vlwe Fort Washington taq dèni høqshaq rvda ò wegø íe.