St. Helena

St. Helena

St. Helena nø gv̀mzø̀ koqkámpè Constantine ò àngmè íe. Àngnø dòngnøt mvsø̀n shèr we nvng cipshì we nøt mvsø̀n vlwe tiqgǿ gø íe. St. Helena nø Constantius Lurus cìl dù wáshì dvgvp àngnø chø̀m vsúng shú tiqgǿ ku Biteni taq vl yv̀:ngì. 20 nǿng vléráì mèpvng àngnø gv̀mzø̀ koqkám bø̀n ráì.

Móng lvmvng rì rvtnø̀ àngní nø vkang vdu yv̀:ngì we ínìgø àngcè pè Constantine nø àngmè Helena nvng tiq dø v̀l ráì we íe. Wervtnø̀ àngcè pè Constantine Gv̀mzø̀ koqkám bø̀nráì wekvt gø àngmè kaq svng dvgùng shvring weí vmíng vya rì svng gø tvle yv̀ngà.

AD 313 nǿng Mazardtius rì svng gvsat dánglún bǿà we mèpvng àngnø kám vsv̀ng tiqgǿ bø̀n ráì. Kámnøt tvrà svng dvtit tvle we tvrà taq St. Helena nø nøt mvsø̀n tiqgóng shvngbe dvzaq dvkángshì ráì we tiqgǿ gø íe. Àngtaqkèní Europe móngdàn rì taq noqngø̀m tø̀ngnø rì gø gvzà vrang ráà we íe. Àng lvpat 72 nǿng taq shv̀nshér we shvrà íwe Jerusalem svng di nø vriq yv̀ngà.

Àngtaqkèní Bethelehem taq vlwe Yesu àngmè shoqwe àngni svng dvgùng shvring we ku kèní we shvrà taq Mari lóngbuq tiqlòng gø vrang ráà we íe. Roma taq vlwe àngò koqkám kó svng gø noqngø̀m tø̀ngnø tiqlòng ku “Santa Cruce in Cerusalemme” wanø líng ráà. Dèni bat høqshaq we noqngø̀m tø̀ngnø vdòngø Yesu Kristu ò wurgáng nvng Pelatus í vru yv̀ngà we vru gø̀m svng we shvrà taq gv̀l:ò we svng gø shálún shìe.

St. Helena nø rvmø paqzí vdèrì, shǿngkøm rvmø bv̀nlì wavm we vsv̀ngrì, shv̀mshi mv́n vsv̀ngrì ò vlǿmrà shv̀nshér vsv̀ng tiqgǿ ku dvgùng shvring ráà wegø íe.