St. Henry II

St. Henry II

Henry ò àngpè ní àngmè nø Charlemagne dvcì kèní tiqrvp gø íe. Henry nø àng cv̀m lvpat taqkèní shvrúngshú tiqgǿ bø̀nlv́m shvrúng nøt zang we tiq gǿ gø íe. Àngnø mònggv̀n paqzí svng St. Wolfgang zùng kèní dáng yv̀:ngà. Móng lvmvng shìwvt rì rvt Bavania svng vtáng yv̀ngì. Germany móngdàn ò gv̀mzø̀ koqkámpè Otto III shì bǿì mèpvng àngò rvgaq svng vtáng nø̀ vrá tuq ráì wegø íe. St. Henry nø St. Cunegundis nvng dø̀ngku shvzøng shìyv̀ngì we ínìgø àngcè cv̀mré mv-vl yv̀ng. Àng lvpat taq àngò pø̀ zaqshøprì shvngbe svng shvngø̀mré kaq apò nø̀ Gvray bv̀nlì taq dvzaqshì lv́m shvrúng nø zangwe tiqgǿ gø íyv̀ngì.

Àngnø Germany móng Bamberg taqø rvcáng cèrìò vtóng kèní Svrado àngké róng svng vrang lúnlv́m dang dvzaq shì yv̀ngì we tiqgǿ gø íe. St. Henry àngnø kámnøt tvrà taq nøtløp shìwe tiqgǿ íwedø tiq dvchá shvrúngshú lvpat svng gø vtang kèní shóngshì we íe. Shvngø̀mré vdòng taq shvrúngshú rì ò cv̀ndøng dvrá rì svng dvcøp shvnvp lv́m dang taqgø dvzaq dvkáng shìyv̀ngì we gø íe. St. Henry II ò dvzaq dvkángshì we kùngà rì taqkèní àngnø gvzà bø̀ngshvng we tiqgǿ gø bø̀n ráì we íe. Àngnø vdu vbóng we dvrá rì nvng rvcángcè rì mvdàm dvsháza nø gv́lshì we tvrà kèní gvzà bø̀ngshv̀ng we shv̀shér vsv̀ng tiqgǿ gø íráì.

St. Henry II svng nø Benedine shvrúngshú mvdò ò vlǿmrà shvrúngshú tiqgǿ ku mvsat nø vrìng yv̀ngà wegø íe.