St. Hugh of Grenoble

St. Hugh of Grenoble

France móngdàn nv̀msvr lvpø vlwe Dofen wama kèní St. Hugh nø àng lvpat 25 nǿng mvril taqni Canon Uqbvdi svng cvndvgøm we roqgvr shú tiqgǿ íyv̀:ngì. Shvngø̀mré dvrá svng roqgvr we tvrà taqgø St. Gregory svng kadvgvp gø vtoò we tiqgǿ gø íe. St. Hugh nø Kámnøt tvrà Gvray paqzí dang taq (3) nøng døp cvnshì yv̀:ngì. Ínìgø jórlún we tvrà mvlúnò. Shvngø̀mré vdòng taqø gø, àng mvdàm taqø gø ngàshàí dvløt gvzàm we gvzà vhǿm yv̀:ngà.

AD 1084 nǿng taq St. Hugh nø St. Brono nvng àng mvdò (6) gǿ maqnø Alfim wamà taq mòngkà dvshvngò nø shvrúngshú zùng tiqlòng svng vrang yv̀:ngà. We shvrúngshú zùng svng nø Grande Chartreuse wanø̀ tǿòe.

St. Hugh taqkèní we shvrúngshú zùng svng rvtø̀ vrv̀m vriqò we wáshì yv̀:ngì. shvrúngshú zùngmà rì kaqsvng dvshà mvhøt we tvrà svng zánlúnlv́m tvrà, vjúrøt dvzaqshì lv́m tvrà, vjúrøt kàrì, tiqgǿ wa dvrá tvrà svng shvdøk shì lv́m tvrà rì svng cvnā ráà wegø íe.

Àng tiqgǿ taqkèní v́m-aq vnvtshì we, shaké vnvtshì we tvrà rì taq dvzaqshì we ínø̀ dvshà vsv̀ngrì kaq chutcháng lúnlv́m dvpat gø àngò zaqshøprì shvngbe svng nvmò nø̀ tubùm dvzaqshì yv̀:ngì we tiqgǿ gø íe.

Àngnø rvtø̀ vrv̀m zaqlè tvrà diwe tiqgǿ gø íwe taq vsv̀ng kaya ígø àngkaq svng vpǿ yv̀:ngà. St. Hugh nø àng lvpat (40) nǿng AD 1132 nǿng taq lvpat béyv̀:ngì nø̀ 2 nǿng vle bǿì wekvt àng kaqsvng shv̀nshér vsv̀ng tiqgǿ ku mvsvt ráà wegø íe.