St. John Berchmans

St. John Berchmans

August 13

Àngnø cv̀m lvpat kèní zitnøt rvwvl nøt kèní vlwe tiqgǿ gø íe. Àng lvpat 11 nøng taq kèní àngò pvlàcè dang vháng vlún lv́m dvpvt shvrúngshú rìí shvngøt dvtú we vdòng shvrúng shú zùng taq rúng yv̀ngì we íe. Àngnø Kàngpè Yesu ò dvshà mvhøt lòng svng vtoshì we ku hí shvnvm màdá we wamà taq vl ráì wegø íe. Àng vsvk 17 nǿng taqnø Jesuit order mvdò svng gòng yv̀ngì.

Weyv́ng kèní 2 nǿng vle bǿì mèpvng Rome kaq paqzí cvnshì nvng búng yv̀ngì. Àngnø shvngø̀mré vdòng taq pvlàcè dang, paqzí dangrì taq zitnøt rv́lnøt kèní zø̀ngwe tiqgǿ íwe taq shølshú shvlá tiqgǿ ílv́m dvpvt wedø àng kaq svng paqzí cvnshì lv́m dvtú wegø íe.

St. John Berchamans nø we zaqlè tvrà miles 900 rvzé vl we tvrà svng hí taq 10 lvbán døp rvmnvng rì nvng dì yv̀ngì. Àngnø we Roma rvgaq svng tuq bǿì kvt shølshú shvlá tiqgǿ dø zitnøt rv́l nøt rì vtoshì lúnlv́m dvpvt wawe nøt mvsø̀n kèní shv̀nshér pè St. Aloytius 30 nøng køp vl yv̀ngì we kok svng rvcvng shìnø kàru rì cvnshì yv̀ngì wanø àngò mvshǿl rì taq yv́nglún shìe.

St. John Berchmans àng shø̀n yv̀ngì we taq ngà nø Gvray yv́ngkèní dvtú we dø vjúrøt dvzaq shø̀nge. Cv̀m lvpat taqkèní shv̀nshér vsv̀ng tiqgø mvbø̀n lv́m svng shóng shø̀nge wanø vjúrøt shìe. Àng taqkèní chø̀myo vjø̀ng Mari kaqsvng gvzà ni dvgùng shvring we tiqgǿ gø íe. Àngnø ni vrv̀m Yesu àngmè Mari ò hang taq vjúrøt dvzaq shìe.

Àng taqkèní mvsat shìwe dvrá rì svng tøp tøp wa cvn dvgøm dvzaqshì we tiqgǿ gø íe. Wervtnø àng lvpat taq tiqni mvdàm tiqni vháng vlún we jór nònggwòn rì svng gø vtoshì lúnòe.

Zitnøt rv́l nøt vlwe John nø dvsháza shóngnøt vl we taq bø̀ng shvngwe tiqgǿ gø ínø̀ vsv̀ng shvngbe ígø vlǿmvm vrvm we nvng vpǿ shvringò we tiqgǿ gø íe. St. John Berchmans nø àng lvpat 22 nǿng taq ni lvpat béyv̀ngì.

Wervtnø̀ shvngø̀mré vdòng taq àngnø shvrúngshú shvnvp rì ò vlǿmvm vrvm we shv̀nshér vsv̀ng tiqgǿ ku mvsat shì ráì wegø íe.