St. John of Capistrano

Saint John of Capistrano

Franciscan mvdò ò bø̀ngshv̀ngwe dvbùshv̀ng mòngkà svra, shvrúngshú tiqgǿ íyv̀:ngì we Saint John of Capistrano svng Italy móngdàn Gapistra myuq taq gv̀l yv̀:ngà. Dvrá vjì paqzí dang taq Barvgu zìdang shábǿà mèpvng àngnø Perugia wamà ò øpshølshú tiqgǿku vl vdu yv̀ngì nø we wamà taq vlwe mvgàmcè tiqmè nvng døngku shvzøngshì yv̀ngì we íe.

AD 1416 nǿngtaq Perugia nvng Malatesles wamàrì dvhø̀ taq bø̀nwe mvjàn taq St. John nø tvpkéò we vhǿm yv̀ngà.

Wemèpvng nø àngò dø̀ngkumè nvng gø vkang yv̀ngì nø̀ St. John nø Franciscan shvrúngshú mvdò svng gòng yv̀ngì. Àngò vléshìwe mvràrì svng Perugia wamà taq vchángshìnø mvrà chutshìwe wáshì yv̀ngì. We mèpvng nø shvrúngshú zùngsvng gònglv́m vkáng røtshì dá:ngí Friar Miner zùng svng gòng yv̀ngì. Àngø vsak 30 nǿng høqshaq Scramento zidòng mok svng kámshì mvlún yv̀:ngò wegø íe.

St. John of Capistrano nø shvrúngshú tiqgǿ vya svng kámshì lúnlv́m dvpvt vtangshaq dvzaq dvkángshì yv̀:ngì wegø íe. AD 1420 nǿng taqnø St. John taqkèní shvrúngshú vya svng kámshì lún yv̀ngà.

AD 1456 nǿngtaq nø Svrabín koqkámpè taqkèní Crusis mvjàn vdòng Turks dvcìrì íwe cèl rì kaq dvbùshvng mòngkà dvshang lv́m dvtú nø dvzv́r yv̀ngà wegø íe. We rvtø̀ taqnø Turks dvcìrì taqkèní Belgrate myuq svng wa:ngò nø Europe móngrì shvngbe svng gvsat lv́m dvgǿshì we rvtø̀ gø íyv̀:ngì.

St. John taqkèní Crusis mvjàn vdòng taq mvjàn cǿmwe cèl 70000 gǿ rì svng jórlún høq shøl yv̀:ngà wegø íe. 3 shvlá naqbǿì wekvt St. John of Capistrano nø záyv̀ng dvjángí zín kéò nø we shvrà taqni lvpat béyv̀:ngì.