St. John Chrysostom

St. John Chrysostom
Shvngømré shølshú rìkaq roqgvr pè St. John Chrysostom nø AD 347 nøng Turagy móngdàn Antioch myuq taq gvlyàngà. Àngnø dvbùshvng mòngkà dvshvng we bvnlì taq gvzà bøngshvng we tiqgø íratnø àng svng Jà nvngøp Chrysostom wanø bøng tø yàngà. Àngnø mòngkà dvshvng shú paqzí vdè tiqgø íwe Libanius yáng kèní paqzí cvnshì bøì mèpvngnø dvrá vjì tiqgø bøn lúnlvm dvdam shì yàngì wegø íe. Ínìgø àng vsvk 18 nøng taqnø Antioch myuqò svrado tiqpè íyàngì we Melitioch mòngkàrì ratnø nøt vlíng vpo ráì weí shvrúng shú tiqgø bønlún lvm nøt ratshì yàngì we íe. We yáng kèní AD 386 nøng taq shvrúng shú vya svng kámshì nø 398 nøng taqnø Constantinople myuqò svrado vya svng kámshì lún yàngà. St. John Chrysostom nø dvshá mvhoq vsvngrì kaq tubùm dvbangā we bvnlì taq shóngshì nø chvpdap aqgø bvnlì dvzaqshì we tiqgø íyàngì. Wewa mvtaq shvrúng shú rìsvng cvndøng dvrárì taq cvndvgøm dvzaqshì lvm tvrà taqgø tubùm dvbangā we bvnlì taq dvzaqshì yàngì we íe. AD 403 nøng tuq ráì dvgvp gàmzø koqkámmè Udocia kaq svng Jezebel wanø bøng língāò we rat vzìng lvm tvrà bung ráì weí àng svng Bettanier myuq kaq lùng yàngà.
We yáng kèní gvzà màléwe rvtø Constantinople myuq taq nvmnøng vnvn shìwe bøn ráì kvt welòngnø gvray í móng vsvngrì kaq dàm ziwe íe wanø lánshì we rat St. John Chrysostom svng chàng vrá go yàngà. We mèpvng nøng taqni noqngøm tøngnø vzànglvp kaq vrang yàngà we Gàmzø koqkámmè ò cømla hang svng vtù we mòngkà dvshvngvtnà we rat vrá tiqkvt we móng kèní lùngò we vhøm yàngà.
We yángò cèrìí dvki vrè ò we shvnip shvnvr we vhømò rat St. John Chrysostom nø AD 407 nøng taq lvpat béyàngì. Àngò ngámshì we shagóng vnvng svng nø Constantinople myuq taq vlwe dvzvŕ rìò noqngøm tøngnø vdòng taq rvda yàngà.