St. John (I)

St. John (I)

St. John (I) nø Roma Catholic shvngø̀mré ò shvrúngshú tiqgǿ íyv̀ngì. AD 523 nøng St. Homesdin shì bǿì mèpvng àngkaq svng shvrúngshú tiqgǿ ku rvcàng yv̀ngà nø mèpvng kaq nø Svrabín koqkám vya svng gø kámshì yv̀ngì we tiqgǿ gø íe. Italy móngdàn svng Arian dvcì rì taqkèní (30) døp øpmò we rvtø̀ kámnøt tvrà dang taq shvnglut we vkáng lún we tvrà taq dvzaq dvkáng shì yv̀ngì wegø íe.

Wervtø̀ taq móngdàn dvrá Policy rì svng gø vlíng vpo lún ráà we íe. Roma vsúyaq nvng koqkám rìò paqzí zíshúrì nvng Constantinople dvhø̀ vzø̀m lv́m tvrà tóngā we rvtø̀ taq gàmzø̀ koqkámpè taqkèní Arian dvcì rì kaq svng vgám we dvrá uqbvdi gø gv̀l yv̀ngà.

Wedø íwe uqbvdi rì vdòng taq St. John (I) nø Kámnøt tvrà Mission svng Constantine kaq wáā lún ráà wegø íe. We rvtø̀ taq St. John kaq svng vní lvp kèní vtoò nø Svrabín koqkám vya svng kámā ráà wegø íe.

St. John nø bv̀nlì wawe tvrà taq nøt døp we nvng vtang kèní dvzaqshì we tiqgǿ gø íe. St. John taqkèní gàmzø̀ koqkámpè kaq svng Arian dvcì rì kaq vgám gvsat we tvrà mvwà lv́m nìm yv̀ngà. Wekvt Deotoris St. John kaq svng nøt mvgø̀r we tvrà bung ráì. Gàmzø̀ koqkámpè nvng Svrabín koqkámpè St. John ní nø mvdøng mvmvn we bv̀nlì dvtúòe waku vzel shì ráì we íe.

Wekvt kèní Svrabín koqkámpè St. John kaq svng tvpmò nø tung shvrúnò dángí làngdø̀m taq shvt yv̀ngà we íe. Wervt St. John (I) nø kámnøt tvrà, døngmvn we bv̀nlì dvpvt shvkse wáshì weí shíkamshì we shvnshér vsv̀ng wanø St. Peter maqò shv̀nshér vsv̀ng shìpvn taq vbá ráì we íe.