St. Leo the Great

St. Leo the Great

Shvngø̀mré mvshǿlrì taq bø̀ngshvngnø dvgùng shvring vpǿwe Svrabín koqkámpè nv̀mlat 1 St. Leo the Great nø AD 400 nǿng taq shøq yv̀ngà. Àngnø paqzí vdè tiqgǿ gø íyv̀:ngnø paqzí mvkrǿm mvdøp vdè tiqgǿ íwedø tiqdvchá àngnø shvrúngshú vya svng kámshì bǿì mèpvng nø Svrabín koqkámpè ò bv̀nlì àngkàng tiqgǿ ku bv̀nlì dvzømshì yv̀ngì wegø íe.

Svrabín koqkámpè Sixstus shìbǿì mèpvng nø àng svng Svrabín koqkám vya svng dvtut rílv́m shvngø̀mré kèní rvcv̀ng yv̀ngà we íe.

Svrabín koqkámpè St. Leo the Great bat taqnø Svrabín kó íwe Vatican móngdàn svng zìdang dvhà:ngò nø dang vrv̀m taq kømzøqdø, mòngzø̀ldø øpshø̀l ráà wegø íe. Àngtaqkèní øpshølwe bat taq shvngø̀mré mè nø mòngzø̀l we mvtaq AD 451 nǿng taq wáshì yv̀:ngì we Charelsidong lìpùngmè høqshaq zìdang vháng vtang íyv̀:ngì.

We lìpùngmè taq Yesu nø rvgaq mvdàmø vsvng shagóng lushì ráì we tiqgǿ wa íe wawe kámnøt tvrà sv̀ng vgám nø Kàngpè Yesu nø Gvray yv́ngkèní vsvng shagóng svng lushì we Gvray àngcè ni íwe dang svng dvkám nø shvdøng kàrat yv̀ngà wegø íe.

Àng lvpvt taq shvngø̀mré vsvngrì, àngò dvzømshúrì shvngbe taqkèní àngnø dvzv́r Peter tiqgǿ døni íe wanø vpǿ shvring yv̀ngà.

St. Leo the Great í Kàngpè Yesu nø vsvng shagóng nvng Gvray íe wawe we 2 dang svng shvng shvng wa dvkámò nø shvngø̀mrémè vdòng taq vtiqlv́m tvràrì svng dèni bat høqshaq dvshèr nø dvtú ráà wegø íe.

AD 452 nǿng taq Gvray ò dàngciq wanø bø̀ngtewe Adilahan nø Roma svng mvjàn dvbung lv́m dvpvt àngò cèlrì nvng wangò we wàráà. Wekvt wemóng vsv̀ngrì nø vtangshaq svre nø vnán ráì nø Roma cèlrìgø svre nøtí àngmaq ò bv̀nlì døngjárì kèní nvrshìnø vtshìwe rì bung yv̀:ngì.

Wekvt Svrabín koqkámpè St. Leo the Great nø Wur gáng hang tiqlòng lá:ngò nø̀ gvsat ráì we pin cèlrì svng gvsat dvzaqshì yv̀ngì nø cèl dupè Adila svnggø wemóng kèní vtáng lv́m dvkám yv̀ngà.

Cèl dupe Adila ígø Svrabín koqkámpè St. Leo the Great mèpvng taq dvzv́r Peter nvng Polo nø muqlàng kèní àngkaq svng kupgvrò nø dvbangshì we svng àng vneí yv̀ngò werat we shvrà kèní vwángshì yv̀ngì wanø gø mvshǿlrì taq vru yv̀ngà we svng yv́nglún shìe.

Svrabín koqkámpè Leo nø àngò vléshì we mvràrì svng chutshì lv́m, vchángshì lv́m dvpvt dvzv́r Peter ò dvgàm svng dinø 40 ni døp vjúrøt dvzaqshì yv̀ngì. Wekvt dvzv́r Peter í àngsvng shøngran dvtanāò nø St. Leo nø vsak shìcv̀m dvgvp kèní Svrabín koqkám vya svng kámshì we mvrà tiqlòng kèní dvgá àngò mvràrì shvngbe svng kàngpè Yesu í vroqā shaqíwe dang vtàng yv̀ngà.

Wemèpvng kèní nø shvngø̀mrémè vdòng taq svrabín koqkám vya svng kámāwe tvrà taq vsak dǿngvm we nvng vrvmwe mvril taq kámā lv́m dvrá svng mvsatshì ráì wegø íe.

Svrabín koqkámpè St. Leo the Great nø AD 460 nǿng taqni lvpvt béyv̀ngì nø àngò shagóng vnv̀ng svng dèni høqshaq Vatican taq vlwe noqngø̀m tøngnømè taq rvdaò wegø íe.

 

Add new comment

6 + 10 =