St. Martin De Porres

St. Martin De Porres

Sv̀ngpv̀n vtoq vtiqwe dang nvng vdu vbóngwe dvrá dang taq shvre, paqzí vdè tiqgǿ íyv̀:ngìwe St. Martin De Porres nø AD 1579 nøng Peru móngdàn taq shøq yv̀:ngà. Àngpè nø shing mùngwe Spain dvcì tiqgǿ íyv̀:ngì nø àngcèpè Martin De Porres nø shingnaqwe tiqgǿ íráì werat àngní mè svng àngpè í cv̀m lvpvt kèní gur yv̀:ngàwe gø íe.

St. Martin De Porres nø àng vsak 15 nǿng taqkèní Lima myuqtaq vlwe Dominican shvrúngshú mvdò zùng svng gong yv̀:ngì nø weyv́ngøni àng lvpvt behøqshaq vl yv̀:ngì wegø íe. Àngnø we zùngtaq paqzí cv̀nshìwe rvtø̀, cv̀m lvpvt taq we shvrà taqø cv́m vtang bv̀nlìshi cèrì íwe vni dvchipwe, laqtun zv́rwe nvng cì lvjángshú dø íwe bv̀nlìrì taq dvzaqshì nø vtang kèní vlǿvm vrvmwe tiqgǿ gø íyv̀:ngì.

Àngkaqsvng dvshà vsvngrì kaq vsùnglv́m bv̀nlì døngjá zí yv̀:ngà we nvng àngmaq dvpvt zìróng wáā lv́m høqshaq dvzaqshì yv̀:ngì wegø íe. Àngtaqkèní wedø vcùngò wetaq nìnàrì gø vbáwe íe. St. Martin ínø we zùng taq vlwe mírì, vgirì nvng døtrì høqshaq àngdàng wáāò nø ámpà shv-vm yv̀ngà we íe.

St. Martin De Porres nø kámnøt tvrà taq shvre tiqgǿ ku dvzaq dvkángshì lú:nòwe tiqgǿ íwe taq àngtaqkèní yoga dvjángrì høqshaq shvzǿm lú:nò we jejú ìshøt svnggø vtoshì lún yv̀:ngà wegø íe.

St. Martin De Porres nø AD 1639 nǿng taq lvpvt béyv̀ngì nø àngò yòr kùngtaq nø we wamà køptaq vlwe móngzøng cèrì shvngbe kø̀mngǿm yv̀:ngì we svng gø shálún shìe.