St. Martin of Tours

St. Martin of Tours

Cèlrì sv̀ng kupgvrwe nvng cèlrì ò vlǿmrà íwe St. Martin nø AD 316 nǿng Hangary móngdàn Pannonia myuq taq shøq yv̀:ngà. Àngnø Roma cèl dù tiqgǿò àngcè tiqgǿ íwe døtiqdvchá cèl dvpsvng gònglv́m mvdø̀ng mvdaq dvkámwe vhǿm yv̀:ngà.

Àng vsak 23 nǿng dvgvp Amiens cèl dvptaq vlwe rvtø̀ taq we cèldvp ò gòngchit taq dvshànø røtvm vsv̀ng tiqgǿ nø vtangkèní zø̀ngkéò nø dvshá mvré íwe sv̀ng yv̀ng bǿà. Wekvt àngtaqkèní àngò gónggwá svng chut:nònø̀ we dvshà vsv̀nggǿ svng dvgwa yv̀:ngà.

Weyaq St. Martin àng yøprà gòngwe rvtø̀ taq àngò yøpnv́ng taq kàngpè Yesu nø weyv́:ngí àngí zí dáràwe gónggwá tiqtut svng gwáò nø vlda we svng yv̀ng yv̀:ngà.

We rvtø̀ kèní St. Martin nø Gvray kaq apnúngshì lv́m nøtratshì yv̀:ngì we íe. Àngnø cèldvp kèní lonø̀ yv̀:ngìwe rvtø̀ taq Barbarian ngànshàrì vréshì ráì we rvtø̀ gø íe. Wewa mvtaq Gàmzø̀ koqkámpè Julian taqkèní gø àngkaq sv̀ng mvjàn tø̀mkaq dìlv́m svrepè wanø àngkaqsvng vzelshìwe gø vhǿm yv̀ngà.

Wekvt àngtaqkèní vtàn yv̀:ngà wetaq ngànø Yesu bø̀ng vdòng taqkèní shvnat mvzø màdá góngsél mvjàn tø̀m svng búnglv́m tvlú ni ǿngàe wanø vtàn yv̀:ngà. We mèpvngni taqni dàlv́mdø íwe mvjàn shvzø̀m lv́m mòngkà nø barvarian ngànshà mvdò lvpkèní vtoqshì ráì we bø̀n yv̀ngì. Wekvt St. Martin nø we cèldvp kèní lonø tìløp kámshìlv́m vkáng svng vtoshì lún yv̀ngà.

St. Martin nø àngò chø̀mdø̀ngku vdòng taq Gvray dvbùshvng mòngkà svng shvngøt dvkámbǿà mèpvng àngnø France móngdàn Liguge taq shvrúngshú dòraq tiqgǿku vl yv̀ngì. AD 371 nǿng taqnø St. Martin nø Toru myuqò Svrado tiqgǿku bv̀nlì vya svng kámshì yv̀ngì.

Àngnø shvlawe rvcángcè vyv̀ng roqshú tiqgǿ ku dvzaq dvkángshì yv̀ngì we gø íe. Àngtaqkèní shvrúngshú zùngrì svng vrāngò nø shvrúngshú rì kaqgø paqzí cvnā we nvng rìngzì rvgaqcèrì kaqgø kupgvr wetaq dvzaq shì yv̀ngì wegø íe.

St. Martin nø àngò làngdø̀m nila taq muqlàngsvng wur vnípa hángshìnø dvjaqwewa wáshìe. Wenila taq àngnø Gvray nvng vtoq vtiq shìwe í àngkaqsvng dvløt gvzàm we ngànshàrì svnggø jór lúnò we kùngàrì vtoshì lún yv̀ngà.

St. Martin nø AD 397 nǿng taq lvpat béyv̀:ngì.