St. Mary Dominica

St. Mary Dominica Mazzarello Virgin

AD 1959 nǿng taq poqpv̀ng ráà we Svléshín shvrúngshú mvdò taq chø̀myo vjø̀ng mè St. Mary Dominica nø St. John Bosco kaqsvng shvla we bv̀nlì tiqlòng íwe dvshà vsv̀ng lvngàré rì kaq vsùng we mvdò kaq svng svmaré rì kaq gø vsùng dvbangā lv́m røt dvtú yv̀ngà.

We mèpvng gvzà màléwe rvtø̀ taqni St. John Bosco nø Piedmont myuq taq vlwe Mornes wamà ò shvrúng shúpè Fr. Pestarino nvng vhøm yv̀ngì. Fr. Pestarino nø àngò shvngø̀mré vdòng taq vlwe svmaré rì kaqsvng paqzí dang shvngøt dvtúā lúnlv́m dvpvt shún yv̀ngà. We rvtø̀ kèní rvcángcè rì kaq roqgvr we àngmè Mari ò mvdò kaqsvng poqpv̀ng ráà wegø íe.

St. Mary Dominica nø AD 1837 nǿng taq rvmá tvmø wavm we dø̀ngku tiqrvp kèní shøq yv̀ngà. Àngnø nøt mvsø̀n mùngnø̀ shèrwe nvng dvsháza shóngnøt zø̀ngwe, Gvray àngò ìshøt kàdvtut lúnwe jejú svng gø vtoshì lún yv̀ngà.

Àngnø̀ Scramento svng vtang kèní shóngshì nø noqngø̀mwe tiqgǿ gø íe. St. Mary Dominica nø àngò rv̀mnvng íwe Petronilla nvng tiqdø Svmaré cèrì kaq laqtun dvce we paqzí nvng Gvray paqzí cvnā we bv̀nlì taq dvzaq shìyv̀ngì.

Tiqni rvtø̀ taq St. Mary Dominica nø àngò wulaq bv̀nlì wawe rvtø̀ Gvray yv́ngkèní shø̀nran dvtan we vtoshì lún yv̀ngà. Àngtaqkèní Gvray àngcè Svmaré rì kaq mvkok vsùngwe shøngrvn svng yv́ng lún yv̀ngà.

Gvzà màlé we rvtø̀ taqni àngò bv̀nlì kùlwàng nø dvrvt cèrì kaq vsùngwe shvrà tiqshvrà bø̀n ráì wegø íe. St. Mary Dominica mvdò kèní wáshì we nímzì shø̀ngni bv̀nlì gø gvzà ni bø̀ngshv̀ng we ínø̀ Don Bosco ò dvtù we lv̀mpvng taq vl ráì we íe.

AD 1872 nǿng August 5 ni taq nø Mary nvng dvgá 14 mvdò kaqsvng rvcángcè rì kaq roqgvr we Svmaré mvdò rì wanø̀ mvsat ráà we íe. St. Mary Dominica nø AD 1881 nǿng àng lvpat shi mvbe we rvtø̀ høqshaq àng kaqsvng àngtaqkèní poqpv̀ng ráà we Svmaré mvdò svng tvrà shøl shú wáshì lv́m dvkám yv̀ngà we íe.

dèni bat høqshaq mònggv̀n móngdàn vrv̀m taqø vlwe shvrúngshú shvnvp Svmaré mvdò 1272 zùng Svléshín mvdò wawe rvcángcè rìkaq tubùm dvbangā we Svmaré rì gorø 16543 gǿ høqshaq v̀l bǿì we íe.