St. Nicholas

St. Nicholas
Christmas gømpaqrì ziwe Santa Claus wanø shvngbe í shá vráì we St. Nicholas nø 3 àngyá mvzuq nøng vdòng Asia Minor Patara wamà taqø gvlyàngà. Turkey móngdàn, Myra sasvna taq vyàng roqshú svrado bvnlì døngjá rí dvzaqshì yàngì we tiqgø gø íe. St. Nicholas nø vtang shaq dvshà we tiqrap taq døngku shvzøng shìlvm pø gvmsùng mvvl nø døngku mvlú:nòwe àngcèmè la 3 gø svng dvkúm mvdángvtnà rat we gøla svng góng nvmvm we bvnlì í pølávm lvm àngpèí dvká:mòe wae. We kà svng St. Nicholas í tá bøà kvt jà mvcheq tiq mvcheq lá:ngònø we chøm døng svng yaqdøng rvtø ø dvgupā yàngà. We jà mvcheq ratnø we nøngnvm kèní vlatmèò døngku svng shvzøngā lún yàngà. Wedøni St. Nicholas í nø rvwè mè nvng nongtøm mè dvpat gø dvbangā yàngà. Wedø dvbangā ò we làngdøm boqtaq nø we nøngnvmò àngpè í St. Nicholas ò jejú svng dømshá bøà nø vtangshaq dvbù nøt í oqà wae.
Shvnshér pè St. Nicholas nø AD 350 nøng taq lvpat béyàngì we ínìgø àngò dvsháza shóngnøt bvnlìrì ratnø mònggvn døng taq bøngshvng we vsvng tiqgø íyàng:ì. 
St. Nicholas ò bøng svng mònggvn vsvngrì í Santa Claus wanø tøvt:nà wenø 19 àngyá mvzuq nøng vdòng, Desh dvcì Protestant rì kèní Svrado pè Nicholas ò bøng svng àngnø kadvgvp gø byo byo cè vlwe, vsvngrì kaq Christmas gømpaqrì túnā pè Santa Claus íe wa tø we yáng kèní Santa Claus wanø tøshì ráì we íe. St. Nicholas nø àngò gónggwá, shvnggán nvng vmo nø mvshè we ínø wurdúng mvtúrì taq mùngnø shórwe vyàng mørí dvce shaq wa gwashì we gø íe. Wedø àngò laqmù rìsvng cvnshì nø Poland móngdànrì taqgø Nicholas ò mvdò wanø poqò weí vsvngrì ò chømrì taq Christmas gømpaqrì túnā we mvdò tiq mvdò vlyà:ngì nø gvzàni bøngshvng yàngì wegø íe. Santa Claus nø Christmas lvngcha dvpat lvjøm vlwe gømla tiqlòng ínø dvshà vsvngrì mvdà:mø shóngnøt zíshìwe nvng nøt mvsøn shèr nø vnvp we lvjøm svng dvtanā wegø íe.