St. Rita of Cascia

St. Rita of Cascia
St. Rita ò àngpè ní àngmè nø úmbríyá taq vlwe abani shìgùng taq tvmø bv̀nlì wavm we vsv̀ngrì íe. Àngnø Yesu kristu ò shvngøt dvtú we dvrá dangrì, téwa àngò dvshà mvhøt tvràrì nvng vdè nvng tvpní shìwe vsvngrì kaq shóngshì ràwe dangrì taq nøt lø̀mnø kámwe vsvng tiqgǿ íe. 
Àngcǿ àngcèrì gø témvnshì ráì nø àngò vjúrøtshì we kàshaqrì svng Gvray í táāòe. St. Rita nø àng lvpat (18) nǿng gøm ráì kvt St. Augustine shvrúngshú zùng svng gong lv́m shvrúng nøt vl ráì. Ínìgø àngpè ní àngmè taqkèní àng svng døngku shvzøngshì lv́m dvpat wa dvtúòe. Weratnø àngpè ní àngmè kàtawe ku Paul Fadiná nvng dø̀ngku shvzøng shì yv̀ngì. 
Àng ò dø̀ngkupè taqkèní St. Rita ò kámnøt tvrà kaq svng kadvgvp gø vtù we vhǿm yv̀ngà. Àngnø vrù rapv̀n rì á:mvq nø àng kaqsvng vtùwe nvng dvcø we wáshìe. 
St. Rita nø àngcè 2 gǿ vdá bǿì mèpvng àngcè gǿní nvng ni vrv̀m noqngø̀m tvrà taq dvzaq dvkángshì we tiqgǿ gø íe. 
St. Rita nø kámnøt tvrà taq dvzaqshì we mvtaq dvshà vsv̀ngrì kaqgø shóngnøt í dvsháza mvkok we bv̀nlì taq nøt lø̀mwe tiqgǿ gø íe. Wedø àngnø vjúrøt dvzaqshì we dang taq vtangkèní dvzaqshì we vdòngø ni àngò dø̀ngkupè gø tiqni rvtø̀ taq nøt vwángshì ráì nø kám vsv̀ng tiqgø bø̀n ráì. Àngò dø̀ngkupè nø vsv̀ngí shvtnò weí lvpat bé yv̀ngì. Wedang nvng singnø àngcèpè gǿní téráì rvtø̀ taq àngpè shvt vhǿmò we dang svng gùn dvtøp we wáshì ráì. 
We dø wáshì we vdòng taqni àngcèpè ní gø tiqnǿng rvtø̀ vdòng taqni shì yv̀ngì. Wekvt St. Rita nø vtangkèní nøt yòlwe ínìgø Gvray àngò wur taqni laqí dvr wawe nøt kèní nøt shvlǿm shìe. We rvtø̀ taqnø St. Rita nø vsvk (30) nǿng rvtø̀ taq íyv̀ngì. Àngnø cv̀m lvpat taq St. Augustine Convent svng góng mvyǿwe tiqgǿ íwe døni tiqkvt vrá dvzaqshìe. Ínìgø góng mvlún yv̀ngò. Àngnø vjúrøt dvzaqshì we tvrà kèní dvzaq dvkángshì we vdòng taqni tiqni rvtø̀ taq àngyv́ng svng shv̀nshér vsv̀ngrì 3 gǿ shø̀ngran kèní vtán ráì. St. Rita nø we shv̀nshér vsvng 3 gǿ nvng tiqdø noqngø̀m tø̀ngnø vdòng taq Scramento ø vjúrøt shì yv̀ngì. Àngmaq nø noqngø̀m tø̀ngnø soqcì gvraq shaq vdòngø vjúrøt shìdvr we nvmik gømla svng vsvngrì kaq dvtan ráà. 
St. Rita nø Gvray vdòngø kàciq gv́lshì nø àngò lvpat svng shv̀nshér tvrà ku vl dvzaqshì ráì wegø íe. Wedø àngnø (25) nǿng høqshaq dvzaqshì ráì wegø íe. 
AD 1442 nǿng Machat wamà taq St. James í Gvray mòngkà dvshvngò we rvtø̀ àng taqkèní Yesu kristu ò dvshà mvhøt we tvrà svng svkse wáshì lv́m vtangkèní shvrúng nøt zángshì ráì. Wekvt noqngø̀m tø̀ngnø døngtám taq dvcaqwe Yesu cø̀mla yv́ngkèní vtangkèní shórwe gálòng shór ráì nø St. Rita ò mv́r svng tvnùngvtnà. Wedø shór kéò we shvrà yv́ngø mvnggvng dø íwe vna bø̀n ráì nø (8) nǿng døp we vna nvng vl vdu yv̀ngì. 
AD 1450 nǿng St. Banadine kaq shv̀nshér vsvng dangò we bóy svng St. Rita àng tiqgø vtang kèní dí mvyǿ we shvrúng nøt zángshì ráì. Wekvt àngò mv́r taq vcaqwe manggvng vna lòng gø zø̀m á:mì. St. Rita àngò vsvk (64) nǿng rvtø̀ taq àngnø 90 miles vlwe zaqlè tvrà tiq tvrà svng hí ku dì yv̀ngì. Jubilee bóy taqø St. James nvng Cadiz kèní St. Dico maqgø vldae. We Jubilee bóy dáng bǿà mèpvng (7) nǿng vle bǿì wekvt St. Rita gø lvpat béyv̀ngì.