St. Slmeon

St. Slmeon

February 18

 St. Slmeon nø Clareofes ò àngcè pè gø íe. Yesu Kristu ò àngnvm vdu pègø íe. Mati nvng Marko kàru taq St. Slmeon ò àngmè nø Yesu àngmè Mari ò àngnvm mè íe wanø̀ vru shaq íe. Dvzv́r rì (72) gǿ kèní tiqgǿ gø íe.

Yesu muqlàng svng lowe nvng shv̀nshér pvlàcè vtánshì ráì we tvrà rì taqgø vbáe wanø̀ yv́nglún shìe. Yesu Kristu shìyv́ng kèní cun bǿì mèpvng Emount tvràø Kristu nvng tiqdø zaqlè tvrà diwe taq St. Slmeon gø vbá we íe. AD 62 nǿng Baska bóy taq Jeruslem Svrado pè Jimes svng Jú dvcì rì taqkèní shvt yv̀:ngà. Àngnø St. Slmeon ò àngnvmpè gø íe. We rvtø̀ kèní St. Slmeon nø àngnvmpè shvrà taq tvle rúng vdu yv̀:ngì. We rvtø̀ rì taqnø shvngø̀mré svng àngshv́r vrangshì we rvtø̀ íwe taq vtù, gvsvt we vsv̀ngrì gø gvzà bung yv̀:ngì we íe.

AD 66 nǿng taqnø Gvray gvsa:ngí St. Slmeon svng Jerusalem vrø̀l lv́m íwe dang kàdvtut ráà wegø íe. Jerusalem kèní 65 ming vsvr we Pella svng Svrado pè St. Slmeon vsélshì nø v̀l yv̀:ngì. 4 nǿng vle ráì wekvt nø Dítius vtù gvsvt we cèl dvprì Yudaq móng svng tuqráì nø Judaq dvcì rì svng gvsvt lú:ngà.

Jerusalem svng shi mà gvsvtò we rvtø̀ (5) shvlá døp wā:ngò nø̀ we wamà taq vlwe vsv̀ngrì kaq svng mvzáng, vtì rì vgámò weí dvkøq wàng svng vjøn lú:ngà. Wedø dvkøqwàng vkǿn ráì weí vsv̀ng kaya rì shì ráì nø AD 70 nǿng taqnø Jerusalem wamà vrø̀l á:mì wegø íe.

Íwe Kàngpè Yesu nvng coqcán rì làngdø̀m dørø̀m á:mpà á:mbóy washì yv̀:ngì we tø̀ngnø nø gvyaq shìwe mv-vl nø ngámshì ráì wae. Wervt mvjàn zø̀m bǿì we rvtø̀ taq nø we shvrà taq ngoqngø̀m tø̀ngnø ku v̀l ráì wegø íe.

Wedø mvjàn rì zø̀m bǿì we rvtø̀ taq St. Slmeon nvng kám vsv̀ng jú dvcìrì tiqmaq nø Jerusalem svng vrá vtáng yv̀:ngì. Davi dvcì rì svng shvtnò nø gvsvt we rvtø̀ taqgø St. Slmeon tiqgǿ lushì lún yv̀:ngà. AD 112 nǿng taq nø St. Slmeon svng Irajan taqkèní tung shvrúng yv̀:ngà. We shvrà taq mvme ni shvrúng bǿà mèpvng nø St. Slmeon svng wurgáng mvdàmø shvt yv̀:ngà. St. Slmeon nø àng lvpat 120 nǿng høq gǿng yv̀:ngì wanø gø shálún shìe. Àngnø dvzv́r rì kèní làngdø̀m lvpat cúnshì ráì pè wanø gø shálún shìe.

St. Slmeon lvpat bé bǿì mèpvng nø dvzv́r rìò vbat bé bǿì wanø̀ vrùng we v̀l yv̀:ngì. Pàwálv́m wani àngnø Yesu Kristu nvng tiqdø dvbùshvng bv̀nlì taq vzø̀m yv̀:ngì we tiqgǿ gø íe.