Sts. Elias and Flavian

St. Elias nø Arab dvcì kèní íe. AD 457 nǿng Egypt móngdàn kèní Palastine móng svng vtshì yv̀ngì we tiqgǿ gø íyv̀ngì. Alexandia kèní Timoti ò shvnip shvnvr we rvtø̀ kèní Palastine svng vtshì yv̀ngì we tiqgǿ gø íe. wekvt Utimose kèní àngkaq svng shvláwa vsùng ráà we tiqgǿ gø íe. àngtaqkèní Jericho taq àngmvdò tiqlòng svng gø poqpv̀ng ráà we íe. AD 469 nǿng taq shvrúngshú vya svng kámshì yv̀ngì nø Jeruslem wama taq shvrúngshú tiqgǿ ku rúng yv̀ngì. Flavian nø Constantinople ò kvsa tiqgǿ íyv̀ngì nø AD 498 nǿng taq rúngtàng vtoshì ráì we íe. 
Elias nø Chasidon council taq vbá wervt àngkaq svng vtù vréshì we gø vl yv̀ngì. àngnø Constantinople ò shølshú mvdò, Ufemious nvng Machadonious mvdò rì taq vbá yv̀ngi. Alexander nvng Antio maqnø Gvray tiqgǿ kaqwa noqwe vtóng svng màtoò we tiqgǿ íyv̀ngì. Gv̀mzø̀ koqkámpè Anadasious 1 ò shvngøt dvtúwe tvrà svng vto yv̀ngà. ínìgø Gv̀mzø̀ koqkámpè ò dvtú we tvrà taq Kàngpè Yesu ò tvrà svng cèò we 2 dang vbáe.

wervt Elias nø we dang svng dvcøp shvnvp lv́m àngsvng vtùò we kàru vru yv̀ngà. we kàru nø Chalceolon lìpùngmè taq pv́ngshì yv̀ngì we íe. AD 511 nǿng taqnø Ceolon myuq taq wáshì we lìpùngmè Chalceolon kàciqrì kámnøt tvrà rì kaq svng cat ráà. ínìgø Svrado rì mvme gǿ kaqsvng gvsa St. Sava kaq welòng svng gvr lv́m Jeruslem kaq dvzv́r yv̀ngà. 
Elias nvng Flavian maq nø rvcángcè rì ò kámnøt tvrà kaq dønmvn dø ripwe rvt Gvmzø̀ koqkámpè ò àng Gvray kaq svng màtoò wervt we móngkèní shvlum yv̀ngà. Gvmzø̀ koqkámpè Anastasius taqkèní we vtóng svng vtolv́m nøt vrá wur me shvme shìlv́m dvtú vtnà we ínìgø màtò ò wervt AD 516 nǿng taq Aila myuq kaqsvng shvlum yv̀ngà. St. Flavian nø Arabya wamà Petra taq lvpat béyv̀ngì. St. Elias nø Aila myuq taq lvpat béyv̀ngì. wervt àngní shòní gǿ kaqsvng Roma myuq kámnøt shvre, shv̀nshér vsvng rì shìpvn taq vbá ráì wegø íe.