Hang vngvt lànglìpè Jackie chán

Hang vngvt lànglìpè Jackie chán nø svmré dvgvp kèní hang vngvt bvnlì taq dvzaq shìráì we tiqpè íe. Àng shøn we taq ngàò lvpvt 6 nøng wa øng:à we rvtøtaq kèní vpèí ngà svng hang vngvt bvnlì kaq ènam:ám yàng ngà gø lánshøng yàngà. Cvm lvpvt taq ngàò bvnlì døngchá rìtaq gvzà mvjor nø dvshà mvhøt lvmwa vhøm yàng:à. Ngà nvmlat hang vngvt shøng we "Butterfly lovers" wa we ဇတ်ကား taq ngà nø shì vsvng vnvng dvng taq kèní hang vngvt shì ràínìgø ngà taq kèní wá mvlún nònø Director pèí gvzà shvmná mvgør we vhøm yàngà. We døí we shì vnvng dø màngvt namshìcè vl lvm gø wá mèlúnò ma wanø gvzà dvrøq we vhømòe. We mèpang mvme baq dvzaq shøngnø wa wálún yàngà. Ngà cvmré lvpvt taq dáy paqzí svra tiqpè bøn lvm gvzà shóngshøng nø dvdam we mangá vl we íe. We dø íwe rvdø taq Camera zaqngò nø vní nøng dvzaq shøngyàngà. We nila taq gvzà bøngte we hang vngvt lànglì tiqpe vlnø àngtaq zánshúrì mvdò taq ngàgø vbá we íe. Ínìgø ngànø àngò zánshú tiqpèò lvmpang zánshú øngà we íe. Hang lànglìpèí ngàsvng shá lvm dvpvt dvzaq shøngnø ni vràm àngdi ra we tvrà shvnvng taqø ripnø mvrdaq dvtán shøng weí tiqni taqnø àng modo taq dèzúnø zánlún bøngà. Bvnlì waì we shvrà taq tuq bøshà dvgvp àngò modo svng dvtølrì shøq:nga ngònø dvsheràòe. We mepangø bvnlì diì we nivràm àngò modo mèpang zánlún bøng nga. Làngdøm taqnø hang vngvt lànglìpè nvng àngò zánshúrì mvmeí eshá ngatnà. Wanø shøe. Àngshøn mvyø we taq vnvp shìshárà we svng shønmvyø we mø:í ínìgø shøngni wawe tiqgønø vsvngrìí vdèsvng shálvm dvpvt kadøí we dvng taq kènígø dvzaq shìrà lòng svng shvdøm we íe. We nila Jackie chánø móngdàn shvngkà rìtaq àngò mvrshàm vpálún lvm gvzà shvrúng we ínìgø vbá mvlúnò. Dènila vsvng shangbeí shábøshà we hang vngvt lànglìpè Jackie Chán nø àngò lvpvt taq àngò lvpvt svnggø màmvpáshì nø dvzaqshì pèíe wae. Hang vngvt shì we bvnlì taq lúnò we damárìnø rømvtømshì bøì híciq wvl ciq shvrø rì giqwe vhømò we mvtaq svmi damá gvbàrì lúnò høqshaq dvzaqshì yàngà wa shøne. Jackie Chán nø àngò bvnlì svng gvzà vbøshì we ínø dèni wá vdu we bvnlìrì svng dèni dánghoq wàò nø dvzaq shì we íe. Àngí nvngòn zinø shøn we kàtaq dèni wa we rvtø svng vhúhwaq vl we í màdvcømmì nø vjø vldø láng shálvm nø mvdøng vchake. Pawálvm wani nvpni wawe rvtø nø kadø bønlonge nøngmaqí shámvlúnì. Dèni taq wá vdu we bvnlìrì døngjárì dèni taq dánglún hoq wáshá lvm vchake wa nø nvngòn zi we íe. Dèni la zìlangré rìí nø tiqnì taq gvmsùng kadángte lúnòe wa lòng svng wa dvjaqònø we døí we gvmsùng svng kadvku dvzaq shìnø lún shìlòng svng mvcan shìrì gvzà vle wanø shvdøm weí nvngòn zi we kàgvl bøà we íe.