Jack Ma

Cvmré lvpat taq dvshà nø dèni pat taq svté gvbà tiqpè bøn lúngìwe miwà móng taq kèní Jack ma nø paqzí zùng taq English kà cvnshì mvlún yàngò we ínø zaqlèrì taq kèní 9 nøng naq hoqshaq welòng kà shálvm cvn dvzaqshì yàngì. Àngò zùngmà bat taq sánpoyrì àngboq boq krat cøm nø paqzí by zùng dáng bøa mèpangø gø company rì taq bvnlì shukshìwe ínìgø bvnlì mvlúnò nø University tiq lòng taq tiq shvlá taq 12 $ wa lúnòwe English lìga shvngøt svra wáshì yàngì. Tiqni rvtø taq America móng svng tuq á:mìnø Internet wawe svng yáng pvngshì yàngì. Tiqni rvtø taq àngí sháòwe English lìga nvng we lòng internet taq kèní àngmaq mìwa móng nvng mòngàn svng wulaq bvnlìrì wa lvm dvdam shì yàngì. Àngò company íwe Ali baba svng wàlúngà mèpvng tiqni vdòng yaq billion ku lúnòwe mìwa móngdànò svté vtang tiqpè írá ìwe Jack maò lvpat taq kadø wa dvzaq shì lúnì we mvshøl svng tashàì. Jack ma nø 1964 nøng September 10 ni taq mìwa tóng laqyà hang bvnlì wawe tiqrap kèní Hanzú myoq taq shøq yàngà. Àngnøng nam taq àngnam tiqpè nvng àng mèpvng àngnam tiqmè vl we íe. Àngnøng namnø dvshá mvré íwe lvpat taq zùng lòngyàngì we íe. Jack ma àngò cvm lvpat taq dvshá mvré zùng paqzí cvnshì yàngì nø rvmnvngrì ígø gvzà mvnyamvm we vhøm yàngà. Jack ma nø English kà nvng kàru gvzà shá mvyø we tiqpè íyàngì. Àng vlwe wamà taq English liga sha we vsvng tiqgø gø mvl we mvtaq liga bok gø mvl nø paqzí zùng taq gø English lìga mvcvnãò wae. 1972 nø taq American móngdàn øpshú pè Richard Nixon mìwà móng svng zaqlèwàng tuq ráì mèpvng nø Jack ma àng vl we Hanzú myoq svng zaqlè gvzà tuq ráì. We dvgvp Jack ma nø vsháng mvgá gá zaqlè vl we yøprá rìtaq dinø English lìga shvngøt shì lvm dvpat zìbè mvlu shìnø tvrà shølshú wáshì nø cvnshì ráìwe rvtø 9 nøng høq shaq naq yàngì. Nvmlat taqàng bøng mvdøng nø Má Yún ínø English zaqlè tiqpè taq kèní Jack wanø bøng zí bøà mèpvng Jack má wanø bøn lúngì. Jack má tiqpè pàwálvm we dángte English kà shá mvyø emá? We rvtø taq mìwà móng vdòng English kà nvng lìga sha we vsvng gvzà mvl we mvtaq communist øpkáng tvrà taq vl we ínø móngdàn vsúyaq taq kèní mòngàn móngdànrì nvng vtoq vtip lvm bángkà gvlaq shì rvtø gø íe. Jack ma taq kèní we dang nvng sing nø mìwa móng nvng dvgá wángzà móngdànrì vtoq vtip lvm bángkà tànvtnò we tiq nì taq wángzà kà íwe English kà èsha we ínì nø àng lvpat vháng lún lvm íe wanø káme. Jack ma àngò lvpat taq paqzí dang nvng dvdamò we bvnlì àngpvn pvn taq àngpoq poq kratsøm bøì we íe. American móngdàn Hávert University svng góng lún lvm dvpat 10 poq sokshì yàngì we íni gø mvlún yàngò. 1988 nøng taq zùng dáng bøà mèpvng bvnlì lún lvm dvpat company 30 lòng høqshaq bvnlì shokshì bøì we ínìgø tiq lòng taq gø àngsvng màtoá:m yàngò. Mìwà byada dap svng gòng lvm 2 poq shokshì we taq shokshì we 5 gø taq kèní 4 gø vbá we taq àng tiq gøí wa vbá mvlún nò. KFC sing taq bvnlì wa lvm 24 gø shokshì we taqø gø 23 gø vbá we ínì gø àng tiq gø nø ngámshì yàngì wanø shønshì we íe. Jack ma nø University tiq lòng taq English lìga shvngøt we svra tiqpè wáshì nø shvlá zìbe 1 shvlá taq 12 dollars lúnò we ínìgø àngò lvpat tvnù mangárì nø gvzà te dø gvĺshì pè íe. 1990 nøng tuq ráì mèpvng nø mìwà móng øpshúpè Dingshong phíng wvl taq kèní mìwà móng wulaq bvnlìrì bábgkà tánavnà. We mèpvng mìwà móng nø tiqni mvdàm tiqni wulaq bvnlìrì taq vháng mvnshì lúngì. Àngnø zùng svra bvnlì kèní nvrshì nø mìwà nvng English kà tvle we company tiqlòng wá pvngvtnà. 1995 nøng taq nàmlat boq America móng svng zaqlè tiqgø nvng zàná:mì kat computer, internet walòng svng yáng pvngshì bøì. We mèpvng nø computer paqzí shawe rvmnvngrì nvng mvngushì nø mìwà nvng wángzà móngrì dvhøtaq wulaq bvnlì walvm dvpat Chinapage website svng wá pvngvtnà kat wángzà móngdànrì nvng vtoq vtip lún bøà nø internet kèní dvrè nvm we wulaq bvnlì walvm dvgøshì ráì. Ínìgø pøgvm sùng lángràwe dang taq vdángkéò weí móngdàn vsúyaq nvng mvngú we bvnlì wawe taq kèní pø nángshì nø dvzaq shìlúngì. 4 nøng vle á:mì mèpvng 1999 nøng taq nø àng rvmnvngrì 17 gø nvng Shares mvngushì nø internet page tiqlòng poqpvngò we taq kèní Alibaba wanø tøòwe company svng wápvng bøà. Àngò Alibaba company nø tiqni mvdàm tiqni vháng lúngìnø online kèní dvrè nvmvm we wulaq bvnlì taq gvzà bøng té bøì we íe. Àngò we long company nø vsvng 15 gø taq kèní wa pvngshì bøì we ínì gø dèni rvtø taq nø àngò bvnlì wá dvzømshúrì 30000 rvzégø høqbøà we íe. Àngí lún bøà we pø gvmsùng nø Dollars 20 billion íá:mìnø mìwà móngdàn taq svté vtang tiqpè bøn bøì. Jack ma àngshøn we kàrì taq kèní paqzí lushì shvla we kàrì nø Àngdèò lvpat taq wá mèyø we lòng svng wá nàløt nò. Èwa lúngò dvgvp-ø shvlá vtang dèzaqshì. Dèzaq shìwe taq mvbøn longwe nø mvl. Dèni nvmchàng møò nø døe. Nvpni téwa dø lònge. Ínìgø tántiq ni nø nvmchàng sórnø gálonge nøt èdat we ínìnø gálóng svng vtoshì mèlún lúngò. Bvnchvtrì vhømshì rakat mènà zingni, dèbu. Pàwálvm wani bvnchvtrì taq vjú vlwe tvràrì vl we íe. Nànvng vtøl we vsvngrì taq kèní ècvn shì. Ínìgø àngmaqí kadø waò lòngsvng chapdap vbóng dø mèwa ni. Àngmaq nvng chapdap vpóngdø èwà daqò kat nà kratsøm sháòe. 21 yazuq taq vháng lún lvm nø nàó dvzømshúrì nø nà mvdàm téwa mvdaq we vsvngrì laqí. Ngàsvng crazy Jack dvrupè wanø etø:nge. Ngànø dvru tiqpè dø bvnlì dvzaq shøngwe írat nø we kà taq ngà mvza:ng. Ínì gø ngànø àngdé tiqpè nø mvø:ng. Págø mèwa we tiqgø taq jøng jøngni pà tiqpvn gø bøn lvm mvl daq.