Li Ka-Shing

Li Ka shing nø 1928 nøng July 29 ni Gondom wamà Chaozhou myoq taq gvl yàngà. Àngpèní àngmè shèní gø nø zùng svra/maqrì íyàngì. Àng cvm lvpat nvmlat zùng long ráì dvgvp nvmbat 2 mòngàn mvjàn bøn ráì nø mìwà móng kèní Hongkong svng yølshì vdu yàngì. Hongkong rvgaq tuqá:mì mèpvng àngpè nø rvshú yógaí shìyàngì we svng gvzà nøt mvshøm lvm vhømyànà. Àng shøn we taq vpè shìwe nø pø gvmsùng mvlnø dvshà we taq zìzí mvlún we rat shí vdu we íe wae. Wedø írat àngò lvpat taq nø vdá mvgàm we tiqpè ílvm nøt ratshì nø dvzaq shì ráì. Àngpè mvl bøì mèpvng Li Ka-shing nø zùng lángshìnø nari sømri wàò we jak róng tiqlòng taq bvnlì wa nø àng rvmnvngrì zùngrung we rvtø taq àngnø bvnlì taq tiqni 16 nari høq shaq dvrè nvmwe bvnlì døngjá taq dvzaq shìyàngì. Àng lvpat 18 nøng íráì kat welòng bvnlì taq General manager tiqgø bøn ráì nø àngchøm raprì svng gø pø gvmsùng tubùm lúnò we tiqgø íráì. Àngò lvpat 22 nøng taq nø àngí nángshì bøì we pø gvmsùngrì zángò nø Yangtze River Plastic Factory wa bøng tøò we plastic jak rong tiqlòng wá pvngshì ráì. Li Ka-shing nø àngpè ní àngmè zùng lìga shvngøt svrarì íyàngì dø tiqdvchá lìga røwe taq gvzà shóngshìpè gø íe. Tiqni taq plastic dang nvng singwe shvngkà tiq rø lúnvtnà. We lòng shvngkà taq Italy móngdàn taq plastic nvmban gvzà nvmvm shvlanø dvpø vlwe dang rø lún bøà mèpvng àngí dvdamò we taq Hongkong rvgaq nø dvpø zìbè yul yùlí wáshvla we ínø Europe móngdànrì mvdàm wálún shìweí nvmvm shvla rae wanø síngbøà kat Italy móngdàn svng we lòng paqzí cvnshì nvng búng á:mì. Àng vrá vtáng ráì mèpvng àngò jakrong kèní plastic nvmpvn waò nø Europe móngrì nvng America móngrì svng Italy móng nvmbanrì mvdàm dvpø yùl dø nvm pvng bøà. 5 nøng naq ráì mèpvng Yangtze River Plastic Factory Company mòngàn taq gvzà bønté lúngì nø "King of plastic flowers" wanø bøng télúngì. 1960 nøng dvgvp kèní Li Ka-shing nø chøm cúnwángrì wan nø vrá nvmvmwe bvnlì svng wá pvng lúngà we rvtø taq móngdàn vdòng taq mvjàn bøn nø vzivrùng wàrá ìdvgvp chøm cúnwángrì dvpø gvzà vjá lúngì. We rvtø taq li Ka-shing nø àngí lún dángte cúnwángrì wanòe mèpvng 3 nøng naq ráì mèpvngnø móngdà vrá mòngzøl ráì dvgvp dvpø shvláí vrá nvmvmò nø svté gvbà tiqpè vpo ráì. 1971 nøng taq nø àngò Yangtze River Properties Limited svng Cheung Kong Limited wanø bøng líng òdángí bvnlìrì taq Shares rì gvzà zángshìnø wulaq bvnlìrì taq dvzaq shì ráì. Li Ka-shing nø 2007 nøng taq Facebook Company svng gø share Dollar 120 wàn høq shaq zángshì bøìwe mvtaq Internet nvng singwe Company rìtaq gø sharerì gvzà záng dvzaqshì bøì pègø íe. Àngí wà bøà we Li Ka-shing Foundation taqkèní Asia móngdànrì vdòng paqzí dang nvng singnø Dollar 2 billion høqshaq tubùm dvbàng shì bøì we svng gø shá lún shìe. Li Ka-shing nø dèni rvtø taq vsak 90 nøng gøm ráì nø Dollar 30 billions høq vdá mvgàm we Asia danò svté vtang tiqpè íwe mvtaq mòngàn svté vtang 20 pè bøng taqgø vbá we íe. Yadø cvm lvpat taq plastic jak rong vdòng tiqni 16 nari høq shaq bvnlì dvzaqshì vdu yàngìwe dvshà vsvng tiqpè nø dèni taq mòngàn svté mvgàm vtang bøn lúnshì we svng tvtit tvle shìwe lvpat mvshøl svng yayáng nvròe.