Mònggvn taq nvmlat vrang yàngà we Catholic ngoqngøm tøngnø

Mònggvn taq nvmlat vrang yàngà we Catholic ngoqngøm tøngnø
Kàngpè yesu shìyáng kèní zunbøì mèpvng àngmè Mariq nvng dvzvŕ yohánnø epesuq muyq svng dvgádø dvzvŕrì gø tiq rvgaq gaq svng yèl shì yàngì. We rvtø taq kàngpè yesu nø vsvk cúnshìwe àngmè mariq svng rvgaq mvdàmø wáràwe bvnlì døngjá tiqlòng svng gvlā ràa. Dvzvŕ yaku gø Spain móngdàn zadabuza kèní Ebru tì shvnvngø vlwe àngò lvmboqrì nvng vjú røt shìwe rvtø àngmaq svng Jerusalem svng ngangnø gvray dvbùshvng bvnlì wàlvm àngmè mariq taqkèní vrá dvkám yàngà. We dvkámkà svng shì màdvgømòke dvzvŕ yakuí nvmlat wáràwe bvnlì døngjá nø saraguza myuq kèní shi mvngangke we wamà taqni yesu àngmè mariq bøng taqkèní noqngøm tøngnø tiqlòng walvm íe wae. Yadø vchyak we shvngkà svng dvtá lvm dvpat muqlàng dvzvŕ rìí àngmè mariq svng saraguza myuq svng shøl yàngà wae. Yadang svng Gvrayò mvshvrpvrá wawe kàru bok taq vru shaq íwe svng yánglún shìe. 
Dvzvŕ yakuí gø we dvkámkà svng cvn cvn dvgøm lúnlvm dvpat 16'-8' gwaqwe noqngøm chøm tiqlòng svng waònø àngsvng zíyàngà we àngmè mariq hang cømla longsvng we noqngøm chøm vdòng gvlònø vjúrøt dángí Jerusalem wamà svng ngang yàngì wae.
We Jerusalem wamà taqni dvzvŕ yaku nø kàngpè yesuò svkse wáshìnø Spain móngdàn saraguza myuq taq àngmè mariq bøng taqkèní vrang ráàwe noqngøm chøm vdòng taq vlwe àngmè Mariqò hang cømla vzàngø dvzvŕ yaku taqkèní vle dø dèni høq dvgá shvrúng shú rì taq kèní vjúrøt pùng Missa svng waò we mvvl wae. We àngmè mariq hang cømla svng hang mariq wa tøòe. We lòngnø shøngkøm rvmul weí wáshaq ínø dèni høqshaq vlnø yánglún shìwe íe. We dvzvŕ yakuí wa yàngà we noqngøm tøngnø svng téwa shvnvp rvmul lvm dvpat Australia móngdàn gàmzø koqkámpè Chairle II pè taqkèní 1681 nøng July 29 ni St. Yakuò bóy àngni taqni vrang pvng yàngà.
We noqngøm tøngnø vdòng taqni àngmè Mariqò hang shvng gvl lvm dvpat vnvpwe noqngøm chømcè tiqlòng svng koqkámpè Fatinan 6 pè taqkèní 1703 nøng taq wa yàngà. We hang vzang taqø we móngò koqkámrì kàciq ratshì yàngì we íe wae. Ezabela koqkámmè taqkèní gø we hang mariq vlwe shvra taq nøng vrvm vpø ringwe pørì älu zíshì yàngì we svng yánglún shìe. Chairle VI koqkámpè taqkèní gø we hang mariq taq àngò shvm mvngjøng svng zíshìnø Justin muyq taq vlwe ngoqngøm tøngnø svng vsélò nø dvrá shvdøkshì weí vl yàngì. Philip koqkám dvcìrì 1,2,3 pèrì taqkèní gø we mariq hang taq dvpø shvdún mvdángshì we pørì älu zíshì ráì. Wedø írat we mariq hang cømla shvnvng gùr gùr taq ring vtang pø zaqshøprì taq kèní gùr kwangò we svng yánglún shìe. Mèpvng kaqnø Mua dvcìrì taq kèní we Spain móngdàn svng 800 rvzé nø øp bøà we mèpvngnø Catholic shvngømré shvrúng shú rì nvng kám vsvngrì shvngbenø shvnip shvnvr we, shvtnò we vhømò nø shvngømré dvrè rì, zaqshøprì shvngbe svng gø gvyaqāò we vhøm yàngà. Wedø ínìgø mariq hang cømla yalòngnø todøni we shvra taq vl we svng dalvm gømla tiqlòng ku yánglún shìwe íe. 1823 France móngdàn shvrepè Napoleoní gø àngò chvpdap taqkèní Catholic shvngømré shvrúng shú rì 77000 dángte svng shvtnò nø shvrúng shú zùngrì 2128 lòng svnggø gvyaq yàngà. We rvtø taq wedø mvjàn bøn we 2 nøng dvhø svmaré rì nvng cvmrérì nø we àngmè mariqò hang cømla vlwe ngøqngøm tøngnø vdòng taq vjúrøt shìweí vl yàngì. Langdøm taqnø we noqngøm tøngnø vdòng taqkèní vjúrøtshì nø vlwe svmaré, cvmré rì svng yàngò nø France cèpdaprì vtáng yàngì wae.
1900 nøng vdòng taq vtangshaq dalvm gømla tiqlòng bøn yàngì welòngnø kám vsvngrì kaq mvshóng wámshì nø shvnip shvnvr we vsvngrì nvng ngànshàrì nø rvtø we dángte naqhøq vlráì we àngmè mariq hang cømla welòng svng gvyaq lvm dvpat bùmí wvp yàngà. Wedø bùmí 3 boq wvpmò we ínìgø bùmlòng mvpoqwe rat gvyaqshì we mvvl yang. Wedø dalvm dø íwe gømla dvpat we noqngøm tøngnø taq vjá yàngì we bùm 2 chàng svng gø dèni høqshaq we shvrà taqni yánglún shìwe íe. Wedø írat we àngmè mariq hang cømla noqngøm tøngnø nø àng dvciq ciq ngàngdøng ráì we Catholic shvngømréò nvmlat vrangshì yàngì we noqngøm tøngnø tiqlòng wanø màná dømru mvshøl bøn ráì we íe. Yalòng noqngøm tøngnø nø 1900 rvzé nøng naqráì we írat we noqngøm tøngnø nvng sing nø St. Agatha kaq àngmè mariqí dvkám yàngà we kàtaq ya noqngøm tøngnø nø rvgaq mvdàmø shvlá vtang íwe mvtaq mònggvn benihøq ngangdøng longe wa kàlòng dìng ráì we svng yánglún shìe. 

Add new comment

7 + 0 =