shvnshvrwe vsvng St. Isidro

Shvnshvŕ pè St. isido nø rvmá tvmø wa:vmrì svng roqgvr pèínø Spain móngdàn Madrid myoq taq 12 yazuq taq dvshà we tiqrvp taq kèní gvlyàngà. Cvmré pvt taq kèní wamà vtánglvpmø rvmá wa:vm we tiqpè íe. Àngnø gvzà vnvp we svmì tiqmè nvng døngku shvzøng shìyàngì we íni gø àngníò àngcèrì lvpvt mvyangnø shíabøa. We mèpvng àngnínø cvmré dvtut mvlushì lvm nønt vrábøìnø St. Isido nø sháng vràm noqngøm chøm dinø vjúrøt shìe. Náni vràm taq gø Madrid myiq yaq vlwe noqngøm tøngnø taq dinø vjúrøtshìe. We dø vjúrøtshì we dvng nvng singnø àngò bvnlì wa rømnvngrì taq kèní bvnlì àngkàngpè svng St. Isido nø vjúrøtshì we taq wa rvtø zíònø bvnlì dvng taq màdvzaq shì wanø shokò we kàrvt tiqni taq nø bvnlì àngkàngpè taq kèní dvchø:aq nà dvgvp àngjøngni bvnlì di bángkrat we ínìgø àng shvnvng taq muqlàng dvzvŕrìí bvnlì wádvbvngò we svng yàngbøa. St. Isido nø dvshá mvré vsvngrì kaq dvsháza shì we ítubumò we bvnlì taq shóngshì we ídvzaq shìpè gøíe. Mvyø shødøng tiqni taq St. Isido nø zungshí tiq burì baq aqnà dvgvp tvrà ramø shøngtiq tøng mvdàmø svréshì we satiqré yàngbøa nø àngí baq:aqnà we zungshí tiqtut svng shv:vm bøa nø loráì. Chøm tuq lúngì kat àngò zungshí burì taq dànzøng nø té shvla we zungshírì svng lúnò we gø vhøm yàngà. St. Isido nø AD 1130 nøng taq gønshaqpé:vmì we ínìgø àng mvl bøì mepvng shvla we nvmik gømlarì gvzà dvtanaò we svng shálún shìe. St. Isidoò døngkumè svng gø Spain móngdàn taqø Santa Maria della Esperanza wanø vpø shvringòe. Pvwálvm wani Spain móngdàn taq nvmgàng we rvtøtaq àngò vgo svng zaqònø móngdàn vsvngrì vjúrøtshì we í tvmø wa:vmrì dvpvt dvbang we jejú lúnò ratnø íe.