Shvrúng shú jau rìò lvpat mvshøl II tut

Shvrúng shú jau rìò lvpat mvshøl II tut

Catholic shvngømré mvshøl rìtaq kàngpè yesu bat taq kèní dvzvŕ rìsvng vrá shvngømrérì svng roqrim lvm dvpat vmíng vkángrì zíònø dèni bàn høqshaq Svrabín koqkám, svradorì nvng shvrúng shú jau rì wanø àng dvtàng tàng bvnlì døngjá rì paqdàng tvleshì nø zømshì we íe. Àngmaqnø gvrayí dvkámshaq pvlàcè chutcháng we bvnlì taq dvciq lvpat kàciq ratshì shaq vsvngrì ni íe.

We rat nø we rúngtàn taq ripwe shvrúng shú rì nø gvrayí rvsvng shaq dvkám shaq gvsa rì íwe svng shálún shìwe íe. Gvray àngí pvnmán yàngshà we vsvngrì gø vrvm mvdàm taq màbóng we jejú gømpaqrì rìn vrá vtoshì lúnì we taqkèní we jejú vdòng taqni mvgvm gàshvlawe ngàshàí dvløt gvzàmwe gø gvzà vhømìe.

Wedø ngànshàpè taqkèní dvløt gvzàmwe nø bashàrì gø vrvm taq vhøm shìwe svng gø síngshá ràwe íe. Wedø íwe shìwvtrì vdòng taq pvlàcè dang nvngòn kùngà dvzaqshì nø shvrúng shú, vyàng roqshú bvnlì taq ripwe vsvngrì nø shvngømré rì dvpat gvzàni vchyak nø vpø ringwe vsvngrì ni íe. Pàwálvm wani àngmaq taqkèní wa Sacramento wawe jejú gømla ngórdocì vmat lún zílúnò we vmíng vkángrì kàngpè yesu yángkèní vtoshì shaq vsvngrì írat íe.

Àngmaq lvpat nø gvray mvrdàngø dvcit lvpat apnúngshì lvm kàciq ratshì shaq íwe dø tiqdvchá ni kadø íwe yaknø mvhøt lvmrì vkøn rawe ínìgø àngmaqò vyàngrérì íwe shvnvømrérì kaqsvng pvlàcè dang taq tvrà shølnø roqrim we bvnlì taq ripwe vsvngrì ni íe. Vdè Kachin móngwvl taq Gvray dvbùshvng mòngkà tuq ráì we mvshøl svng èyàngvtnò dvgvp gø St. Columban shvrúng shú mvdò rìnø àngmaq nvng màbóngwe dvcìrì rvgaq, tónglaqyà, vm-vq lvm dang yakwe, àngmaqò àngrì àngrvprì svng gurònø lvpat zíshì we høqshaq dvzaqshì nø gvray dvbùshvng wawe ya gálòng dvyø svng kvt ráà we íe.

St. Columban shvrúng shú jau rìí tòngráà we shvngømré tvrà svng tvtut roqrim lvm rat dèni bat taq nø vdè dvcìrì taq kèní gø shvrúng shú jau rì vl lún bøshà we íe. Kámnøt tvrà pvlàcè chutcháng we bvnlì wawe nø yaklvm shìwvtrì àngpvn pvn vhøm shìwe mvtaq dvløt gvzàmwe rì vdòng taq nøt shvdøk shìnø dvzaq dvkángshì we svng síngshá ràwe íe.

Bashàrì shvngbe taq mvrà vléshá shàì we vsvngrì wa íratnø tasvng tubùm dvbangā kélvm gø gvzà vchyake. Fr. Marcian shønyàngì we taq chvpdap rvtø taq shvlawe bvnlì èwaò we nø tuqrawe mèpvn rvtø dvpat shvlá vtang dvgø shìwe íe wae. St. Mother Teresa shøn yàngì we taqgø tiqdá vsvng kaq vtùnø yikewe bvnlì wawe tiqgø taq kadø gø vsvng kaq dvsháza nøt gvlshì mvlúnò wanø shøn yàngì. Shøn mvyø we taq shvngømré vsvng tiqgø taq we dø shvrúng shú rì svng tubùm dvbangā lvm, vpø shvring shì shálvm nvng pvlàcè nvngòn lushì shálvm shvdøm we íe.