St. Agnes of Rome

Vyàngcè wanø lvjøm lúnshìwe bøngsvng tøshìmè St. Agnes nø Roma dvcì kèní gvzà vnvp we svmaré tiqmè ínø àng lvpat taq gvray kaq apnúngshì lvm shvrúng we nøtí døngku shvzøng shì lvm tvrà svng gø vtiqshì yàngì we íe. Àngkaq shóngshì nø rot rawe vsvngrì kaq àngí vtànò we taq àngnø bashà vneí yáng mvlún shìwe muqlàng móngdàn lvngàshvr pè dvpat shóngshì shaq íwe svng shøn vtànòe.

Àngò wedø nøt ratshì we kàciq rìrat vlù vlàngrì taqkèní àngnø kám vsvng tiqmè íwe svng dømshá lúngà. We rat AD 304 nøng àng vsvk 11 nøng dvgvp àngsvng wedang nvng singnø dvrá rúng taq jipmò we vhøm yàngà. Àngsvng dang angpvn pvn kèní jipmò nø àngsvng nøt vwángshì lvm dvdutnò we ínìgø àng taqkèní nøt língshì lvm svng mvwáshì yàngì.

Werat àngsvng shvnip shvnvrò nø dvkiò we ínìgø àngò gvray kaq kámnøt taq zømshì weí jór nvngòn lúnòe. Wewa mvtaq àngsvng màshvla we svmaré mvdòrì taq gvlò dvgvp àngsvng dvchvplvm dvkángshì we lvngàré rìgø nezøq dvzvŕ yàngà we svng yánglún shìe. Werat St. Agnes angsvng vgo tutnònø shvtnò dángí àng vnvng svng Norman tvrà lóngbuq taq rvda yàngà.

Werat we lóngbuq taqni àngsvng shvgùn shvringò we taqkèní AD 350 nøng taq noqngøm tøngnø tiqlòng vrang yàngà. St. Agnes àngshøn yàngì we taq nàmaqò shvmtaq ngàò shvwi vmvt èlún nønge ínìgø gvray kaq apnúngshì shaq ngàò shagóng svngnø nàmaqí kadøgø dvchvp mvlún shì wanø shønyàngì.

Àngò noqngøm tøngnø vlwe Roma myuq taq nøng vrvm January 21 ni taq vyàngcè 2 go núngò weí vpø shvring we noqngøm tvyø wáshì we svnggø shálún shìe. Weyángø núngshìwe vyàngcè go níò mørí zvtshì we mvni tiqhøng svng nø St. Peter nvng St. Paulò bóy àngni núngpà taq gvlshì dángí welòngnø vyàng roqshú shvlá gømpaqku svrado rìsvng tvle shìwe íe.