St. Anthonio Mary Zaccaria

St. Anthony zakaria

Clerks regular of st. Paul mvdo svng poqpvng yàngàwe st. Anthony nø Italy móngdàn Cremona myoq taq 1502 nøng taq shøq yàngà. Àngnø cvmdvgvp kèní àngpè shìyàngìwe ínø àngmè wultaq télúngìwe mvtaq kámnønt tvrà dangøgø gvzà shvngøt dvtú yàngà we íe. Àngnø dvshà mvhoq vsvngrì kaq svng dvsházanønt tepègø íe.

Àngnø Badwa myoq taq zìpaqzí cvnshì bøìnø bvnlì walvm rvt chømsvng lo ráìwe ínìgø shvnshvŕ pvlàcè taqkèní àngsvng shagóng chutcháng nø dvbanwe mvtaq pvlàce chutchángwe bvnlì nøtéwa ringnø vpøwe svng síngshá dvzár bøa. Wemèpvng àngnø Gvray paqzí cvnshì bøì nø zìlàngrérì kaqsvng Gvray tvrà cvndøng lvm shvngøt dvtúvtnà.

AD 1528 nøng taq shvrúng shú jau vya kámshì bøì mèpvng Milan myoq svng vcélshì ráìnø tvrà vmvnwe svmarécèrì svng chutcháng lvm dvpvt svmaré mvdò tiqlòng svng poqpvng yàngà. 2 nøng naqbøì mèpvngnø rvsángcèrì dvpvt Gvrayò jejú gømlarì svng téwa síngshá lvm dvpvt shvrúng shú rømnvng tiqpè nvng Clerks regular of st paul wawe mvdò svng poqpvng yàngà.

We rvtø taq shvngømré àngké rúngnø St. Barnabaò noqngøm tøngnø taq vlwe írvtnø we shvngømré kaqsvng Barnabitesrì wanø bøngté yàngì. St. Anthony nø dvzvŕ shú bvnlìrìtaq mà:vm màyøp dvzaqshìpèínø kùngà vnønráì weí AD 1539 nøng àng lvpvt 37 nøngtaq ni lvpvt péyàngì.