St. Anthony

St. Anthony

Kám nønt shvre tiqpè ínø dvshá mvhoq vsvngrì kaq roqgvr we shvnshvŕpè St. Anthony nø AD 1195 nøng Portogy móngdàn Lespone myoq taq gvlyàngà. Àngò lvpvt 15 nøng taq St. Augustine kàgvp núngshú zùng svng gòng:ámì nø kàgvp núngshú aya svng kámshì yàngì.

AD 1221 nøng taq St. Francis shvrúng shú mvdò taq kèní kámnønt tvrà taq shíkàm shìbøì we shvre 5 pèò dvrèrì svng Moragu móngdàn taq kèní Portugal móngdà kaqsvng lù:ámà mèpvngnø wedø kámnønt tvrà taq shíkamshì bøì we vsvngrìò bvnlì rìsvng cvn lvm nønt vyuq lúngì.

We mèpvng St. Anthony svng Africa móngdànrì taq vlwe Muslim vsvngrì kaq Gvray mòngkà dvshvng lvm dvzvŕ bøa we ínì gø gvzà màlé ke záyàng gvbà vhømò weí Portugal mòngdàn svng vrá vtáng vdu ráì. We dø vtángráì tvrà ramø àngzúnshì we shø lòngnø nvmbøng mvrù mèmøt we í Portugal móng svng mvtuq nø Sisili wa we shvrà taq tuq ráì we í we mông taq vl we St. Francis nvng vhøm yàngì. Forli wa we shvrà St. Anthony svng shvrúng shú zùng taq súngshú wá dvzvŕò nø vl dvgvp St. Francis nvng St. Dominican mvdòrì taq kèní shvrúng shú jau vya kámshì we poy tiq lòngtaq mòngkà tun vdu ráì. St. Anthony àngò mòngkàrì gvzà shvla we ínø øpkángshúrì taq kèní àngsvng bindit móng nvng Italy móngrì kaq svng Gvray mòngkà dvshvng lvm dvpvt dvzvŕ bøa.

Àngò shvla we góngnønt mvsøn rìnvng dvbùshvng mòngkà nø vsvng loksokrì í vtò we mvtaq chømpaqzí dang taqø gø gvzà mvdaq we ínø mvnoq mvkám vsvngrì gø Gvray tvrà lvp svng poshì ráì. St. Anthony nø Duba myoq taq vl we rvtø vsak 36 nøng taq lvpvt béyàngì we ínø tiqnøng vle vmì mèpvng shvnshvŕ vsvng tiqpè wa nø dang yàngà. Àng mvl lvmì mèpvng àngtaq kèní dàlvm lvmik gømlarì gvzà dvtan lúngà e í gvzà bøng téyàngì. St. Anthony nø dvshá mvhoq vsvngrì dvpvt vlømrà í we mvtaq àngtaq kèní vjúrøtà nø dvtit tvleà lvm dvpvt zangshì we ãlurì svng gø St.

Anthonyò zidòng mok wanø tø yàngà. Vdèò dvrè tiq pvn pvn vmvng:vm dvgvp vrá yánglúnshì lvm dvpvt St. Anthony taq vjúrøtshì shvla we íe. Pàwálvm wa ni tiqkat shvrúng shú zúngmà tiqpèò noqngøm lìga buk vmángvmì dvgvp St. Anthony taq vjú røt shìe we mèpvng lìga buk køò pè yøpnvng taq St. Anthony taq kèní vrá vtángãlvm dvkámò we vhøm yàngà.

Add new comment

3 + 3 =