St. Anthony of Egypt

St. Anthony

rvgaq mvgòng móngtaq doraq mvdò svng poqpvng yàngà nø doraq mvdòò shølshú tiqpè íyàngì we St. Anthony nø AD 251 nøng Egypt móng taq gvlyàngà. Àngpèní àngmè shìbøì mèpvng angí chøm cúnwángrì nvng zaqshøprì svng àngnvmè kaq roqgvr lvm dvkám yàngà.

St. Anthony ang vsvk 20 nøng dvgvp nøqngøm tìyø tiqlòng taq rung dvgvp angí tálún bøà we Mati 19:21 taq " Yesuí ang svng, “Nà kø̀mgøm mèyǿ nìnø, nà nàdá rì ènā:mò nø dvshà rì svng èzíò. Wekvt muqlàng taqlapmø zaqshøp èv́lā dae. Wedá:ngí Ngà mèpvng ècv̀n rā,” a:lòe. " wawe jømciq svng tálún bøà kvt angnøt mvsøn vdòng taq vtangshaqni nøt vshvt ráì wae.

Weyáng kèní angtaq vlwe pø zaqshøprì shvngbe svng vlu vdánrì zíshì nø pvlàcè bvnlì taq dvzaqshì yàngì we svng yánglún shìe. St. Anthony nø Mati 6:31 taq " Wervtnø̀, ‘Pà v́mlv́m! Pà aqlv́m! Pà gwāshìlvm!’ wa, góng mèginøngni. " wanø vru shaq íwe dø tiqdvchá àngnvmè svng gø gvray bvnlì taq vpnúngshì lvm dvpat sisters zùng taq gvlò nø àngnø rvgaq mvgòng móng svng ngang:vmì dángí doraq tiqpè wáshì nø dvrá shvdøk shì yàngì.

We rvgaq taq àng vl dvgvp màshvla we sadaní àngsvng àngpvn pvn ku gvzàmnø dvløtnò we ínì gø St. Anthony ang taqkèní v:maq vnvtshìnø vjúrøt dvzaqshì we kùngàí dáng lúng yàngà we svng yánglún shìe. Mèpvng kaqnø vsvng loksukrì àngmèpvng zànráìnø pvlàcè dang taq shølshú tiqgø íráì. We ratnø St. Anthony ang taqkèní nvmlat Christian doraq mvdò svng poqpvng yàngà.

St. Anthony nø angò cvnshú rìsvng angdè nø dèni mø:íni nvpni taq shìlvm vsvng tiqgø øngàe wanø sunshì weí angdèò lvpat làngdøm rvtø taq shvlá vtang bvnlì svng wá dvzaqshì we taq cúnshì ràwe svng shvngøt dvtú yàngà. AD 337 nøng Roma Constantine Gàmzø koqkámpè taqkèní St. Anthony kaqsvng àng lvpat svng gø St. Anthony angò shvla we vjú vrá vlwe bvnlì taq vpshønge wawe shvri kàru vru yàngà.

We kvt st. Anthonyí angò cvnshú rìkaqsvng gàmzø koqkámpè wawe nø bashà tiqpè wa ínø ang taqkèní kàru tuqráì we svng dvbù lvm mv vl Gvray gvsvngí lòngzàpè yesu svng dvzvŕò nø dvbùshvng wàbøà we taqwa dèbù nøng wanø vtàn yàngà. AD 355 nøng tuqráì kvt àng rvmnvngpè st. Adana Sioux taqkèní røtnímshì ráì wedø tiqdvchá we móng taq vlwe vsvngrì nø Yesu nø gvray mø:í vsvng jøng jøng tiqgø wa íe wawe kámnøt svng dvshvtā lvm dvpat Alexander wamà svng búngámì nø Yesu nø gvray vjøng íwe svng shvkse wáā yàngà.

Wekvt we móngò koqkámpè taqkèní St. Anthony svng àngò móng vdòng taqni vlnø kámnøt tvrà taq tvrà shølshú wáā lvm dvkámvtnà kvt St. Anthony angí vtànò we taq nga nø tì yángkèní vdàm kaq èlùò nìnø shìvme wedøni dòraq tiqgø taqgø àngdè tiqgøwa vl nø dvrá shvdøkshì we mv-vl nìnø lvpat vsvt lvm wa íe wanø vtànòe.

AD 356 taq St. Anthony ang lvpat shi mvbe dvgvp kèní àng vnang svng nø shìgùng mvdàmø rvdaā lvm lvpshì yàngì. St. Anthony nø ngànshà rìò dvløt gvzàmwe rìkaq dánglúnò we mvtaq zømwàng shàrì svng gø àngò kàta dø wálúnò we paqzí vlwe tiqgø íratnø àngsvng rvmá tvmø wavmrì nvng chøm cúnwángrì taq roqrim shìwe nìnàrì kaq svng roqgvr we shvnshvŕ vsvng tiqgø ku vpø shvring shìwe íe.