St. Benedict

St. Benedict

Nvmløp móng taq vlwe doraq mvdòrìò shølshú vgo íwe St. Benedict nø Italy móngdàn Norcia taq shøq yàngà. Àng lvpat taq chàng laqyà tinwe àngò rvmnvngrì svng yàngò nø svreráì weí àngò lvpat 20 nøng taq subiago shìgùng svng lo nø vlyàngì. Tiqni taq àng nvng vshá kéyàngìnø gvzà vnvpwe svmaré tiqmè àngò shøngran taq diráì nø àngò nøt vdòng taq dvchvp mvyø we nøt bung dvzvŕ lúngà dvgvp st. Bernadette nø we langíni àngò góngwárì chutnònø banghø sátaq vdøpshìnø shvwi shvyø shìweí àngsvng dvchvp we ngànshà svng mvngan yàngà. St. Bernadict nø màshvlawe taq bøngte we doraq zùng tiq lòng taq øpshú wáshì dvgvp àngò zaqwe dvrá svng cvn mvwáshìrì taq kèní àngí lángòwe svbiq gùm taq mvtu pvla zángaònø shvt lvm wavtnà. Ínìgø àng vjúrøtshì lúngì dvgvp møni welong mvtuq pvla zangwe svpiq gùmnø bàngvshin dev:mì rat shìlvm kèní lutshì yàngì.

Àngò chøm shvnvng taq vlwe shvrúng shútiqpè íwe Floridius ígø àngsvng shvtlvm dvdamò weí zidòng taq pvla zángàònø kámòwe ínìgø mvbøn yàng. Mèpvng nø àngsvng màshvlawe svmarérì taq kèní dvchvp dvzvŕònø la gvyaqvt nòdø àngpvn pvn ku kámòwe íni gø àng svng kadøgø shvtmvlún yàngò. We dø ngàngshàrìí gvzàm we àngpvn pvn vhømòwe taq kèní lútshì lúnlvm dvpat AD 530 nøng taq subiago rvgaq svng gurònø Cassino rvgaq taq doraq zùng tiqlòng svng vrá poqpvng yàngà. We lòng zùng taq jàímvkupmò we dvrá wanø lvjøm lúnshìwe vjúrøtshì lvm nvng chvpdap bvnlì taq gø dvzaqshì ràwe wawe dvrá gvlbøàwe ínø àngmaq doraqrìnø tiqni vdòng taq 8 nari vjú røtshìnø, 8 nari bvnlì wa dángí 8 nari yøpwe íe. Guld vsvngrì taqkèní Italy móngdàn svng mvjàng gvsvtvnà dvgvp koqkámpè dobiqlaqí st. Bernadict svng paqzí dvløtvnàwe mèpvng koqkámpè ígø àngsvng gvzà vpøvmyàngà. St. Benedict nø AD 547 nøng taq shìyàngì we ínø Svrabín koqkámpè taqkèní àngnø Europe móngsvng roqgarpè íe wanø dvkám yàngà. St. Bernadict mvdò taq kèní deni rvtø høq Svrabín koqkám 50 gø, svrado 7000 gø nvng shvrúng shú jau 40000 gø høqshaq bøn bøì we íe.