St. Blaise

St. Blaise

Naqtú taq bønwe yóga dvjáng vhømò vsvngrì kaq roqgvr we St. Blaise nø Armenia taq dvgùng vl we døngku tiqrap taqkèní gvl yàngà. Ang nø Christian rìò kámnøt tvrà paqzí vdè tiqgø íwe mvtaq cì svra won tiqpè gø íyàngì. Wemèpvng shvrúng shú vya svng kámshì lún yàngà nø Selbastirel taq Svrado tiqgø bønráì.

Luchinious gàmzø koqkámpè bat taq kám vsvngrì kaq dvki vrè we íratnø àngí nìnà sha ngarì cìzí dvbanò nø roqrimò we lóngbuq taq we vsvngrì gø dvgø shì shvrà íyàngì. Tiqni taq we shvrà taq ni shayit rìí àngsvng yàng bøà nø St. Blaise svng tvpmò nø Armenia taq rungwe Romaq móngøp pè svng tvle yàngà.

Wedø àngsvng tvplúngà we tvrà rvmø nga shvrøí dang kéò nø shìlvm dø íwe svmaré tiqmè àng yáng svng tuq ráì. We kvt àngí vjú røtnø cìzí òwe taq weyángø ni wemè svng dvban yàngà. We yáng kèní St. Blaise svng naqtú taq bønwe yóga zønlì rìsvng dvbanā lúnwe tiqgø wanø vpø shvringò we vhøm yàngà.

Gvzà màlé we rvtø taqø ni St. Blaise nø kámnøt tvrà taq dvki vrè we vhømò nø shvm kwèraq í pòr chaqò we nvng vgo tutnònø shvtnò we vhøm yàngà. We ratnø St. Blaise àngò bóy angni taq nø svmi tvróng svng wurgáng hang wàò nø vsvngrìò naqtú svng vjú røt shvmánā ò we svng wà yàngà. We rvtø taq naqtú nvng singwe zønli dvjáng vkøn rakvt àngkaq vjú røt shìwe taqkèní dvbanā we jejú gømlarì gvzà dvtànā yàngà we svng gø yánglún shìe.