St. Clare

St. Clare of Assisi

Poor clares mvdò svng poqpvng yàngà we St. Clare nø 1193 nøng Assisi myoq taq vdá mvgàmré tiq rap taq kèní gvl yàngà. Àng lvpat 19 nøng taq kám nøt tvrà nvng sing nø St. Francis ò á:m-aq vnvtshì we dang mòngkà svng shóng wámshì rat àngnø Portiuncula svng Kàngpè yesuò tvrà taq apnúngshì lvm dvpat mvyøní dìá:mì. Àngò vpøwe góngwá pèlaqrì nvng yangóng íwe vni svng gø tutshì bøì nø gurò dángí Bastia taq vl we Sister zùng taq vl yàngì. Àngchøm raprì taq kèní àng svng vrá go lúngà dvgvp àng shøn yàngì we taq àngnø kàngpè yesu tvrà taq wa gønshaq zíshì lvm ínø døngku shvzøng shìlvm nø mvl wanø shøn yàngì. St. Clare nø àngò rvmnvngrì nvng Sister mvdò tiqlòng svng gø poq pvng yàngà. Poor clares wanø vsvngrìí shá òwe àngmaqò mvdò nø dvshá mvhøt we nvng nøt tønshì sórí vlíng vpo shìwe dang taq dvzaq dvkángshì we íe. Àngmaq nø hí shvnvm màshvnvm shìnø di we, ni vrvm á:m-aq vnvtshì nø vjú røt shìwe bvnlì taq dvzaq dvkángshì we íe. 1224 nøng taq Frederick II pè wapèò cèl cèrì Assisi myoq svng tøl lvm mvjàn gvsat dìráì kat St. Clare nø shvnshvŕ we scrementu gùm svng lángò nø àngmaq kaq svng dìráì dvgvp cèlrì taq gvzà svré dvké nø dàlvm dø íwe nvmik gømla dvtanshì ráì weí cèlcerì shvngbe nø we shvrà taq kèní yølshì á:mì. St. Clare nø AD 1253 nøng August 11 ni taq gønshaq béyàngì.