St. Clare of Assisi

St. Clare of Assisi
Poor clare mvdò svng poqpvng yàngà mè St. Clare of Assisi nø AD 1193 nøng Assisi myuq taq dvgùng shvngwe tiqrvp taqkèní gvlyàngà. Àng vsvk 19 nøng taq St. Francis ò á:m-aq vnvtshì nø vjúrøt dvzaqshì ràwe rvtø taq cvndøng dvrárì kaq shvrúng nøt kèní Portiuncila myuq svng gvray bvnlì taq apnúngshì lvm dvpat búng yàngì. Àngò vpø ringwe góngwá rìnvng yangnø vnvpwe vni svng gur bøà mèpvng St. Francis í àng svng bèlaq bøt tiqdùng nvng Bastia myuq taq vlwe Benedine sister zung taq gvlyàngà.
Àngò àngrì àngyàngrì àngkaq svng chøm svng lo lvm dvkámò we ínìgø àng taqkèní vta:ngò we taq Yesu kristuq svng kámnø àngmè pvng cvmlvm tvrà kèní dvgá døngku shvzøngshì lvm tvrà svng wáshì lvm mvvl wanø vtiqshì yàngì. 
St. Clare of Assisi nø we dø Gvray bvnlì taq dvzaqshì nø St. Dimiano shvrúng shú zùng shvnvngø sister mvdò àngshvr tiq zùng svnggø poqpvng yàngà.
Àngmaqò mvdò svng Poor Clares wanø vsvngrì dvhø bøng shvng lúngì wedø tiqdvchá dvshà mvhøt we tvrà vdòng mvrà kèní nøt vwángshì lvm cvndøng dvrárì svng cvn dvgøm dvzaqshì yàngì. Àngmaqnø híshvnvm màdá tvrà diwe, ni vrvm v:m-aq vnvtshì nø kàshøn vyá shìwe taqkèní nøt shvdøk shìe. AD 1228 nøng Svrabín koqkámpè Gregory IX pèò bat taq St. Clare svng dvshà mvhøt we cvndøng dvrárì taqkèní shvlutwe vko vkángrì svng dvtú ò dvgvp gø St. Clare of Assisi taqkèní Yesu kristuq àngò dvshà mvhøt we tvrà kèní dvgá tvrà svng cvnlvm mvvl we svng vtàn yàngà. Weratnø Svrabín koqkámpè taqkèní àngsvng Privitegium Pauperitatis wawe vko vkáng vya svng zí yàngà. AD nøng Frederick II ò cèldvp rì Assisi myuq svng vtøl lvm tuq ráì dvgvp St. Clare of Assisi nø Sacramento gwìn svng lángò nø àngmaq svng dvhøm yàngà. Wekvt dalvm nvmik gømla tiqlòng chan vnán tuqráì nø cèlrì shvngbe svng vngvtshì màshvla høq mvchum kébøà. Weratnø we cèldvprì nø vtangshaq svre lú:ngì nø we wamà kèní vt yàngì.
AD 1253 nøng taq St. Clare of Assisi nø lvpat bé yà:ngì we ínø àng shi mvshì dvgvp Gvray kaq oqà wanø ngàsvng èpvng yàngàrat gvray dvgùng gùngshvng laqvl daq wanø shvring shvta we kà gvlyàngà.