St. Dominic

St. Dominic
Ordo Praedicatorum shvrúng shú mvdò svng poqpvng yàngà we St. Dominic nø AD 1170 nøng Spain móngdàn Calaroga myuq taq gvlyàngà.
Àngnø shvrúng shú vya svng kámshì bøì mèpvng Osma myuq Cathedral taq shvrúng shú bvnlì dvzaq shì yàngì. We yángø vlwe rvtø taq àngnø St. Augustine ò cvndøng dvrárì Upvdi paqzí svng cvnshì nø cvndøng dvzaqshì yàngì we íe.
AD 1204 nøng taq St. Dominic nø Denmark móng svng zaqlè diwe rvtø Taulous myuq taq vlwe hotel àngkàng tiqgø svng vlíng vpo dvzvŕ yàngà. Weratnø St. Dominic shøn yàngì we taq dvbùshvng mòngkà dvshvng wenø nøt mvsøn shvrúng nøt svng téwa dvkángā lúnwe kùngà tiqlòngni íe wanø shøn yàngì.
Wemèpvng àngnø Frence móngdàn tìni lvp taq vlwe French Albigenses mvdò kaq svng dvbùshvng mòngkà dvshvng lvm dìyàngì. We rvgaq taqø àngò dvbùshvng mòngkà, àngò shvnshér we lvpat tvrà shvkse rìrat kám vsvng, rvcángcèrì kazà rvkwe lún yàngà.
Vsvngrì í St. Dominic kaq nàò mòngkà rìsvng vsvngrì í yadángte shóngshìnø vlømvm we nø kadø íwe kàru bokrì taqkèní écvnshì we ímá wa røtnò kvt, àngí vtangò we taq dvsháza shóngnøt kàru bokrì kèní wa yarì lúnshìe wanø vtàn yàngà.
St. Dominic taqkèní àngò rvmnvng rìnvng tiqdø Taulous myuq taq Ordo Praedicatorum shvrúng shú mvdò svng poqpvng yàngà. We shvrúng shú mvdò svng AD 1216 nøng taq dvrá shvng shvngømré taqkèní vto yàngà we íe.
Àngí shvngøt dvtú we taq gvray nvng kàshøn nø vtoq shìlvm dang taq dvzaqshì ràwe svngwa shvngøt vjøn we íe. St. Dominic nø Yesu àngmè mariq kaq svng dvgùng shvring we nvng vpø shìwe ku vnvp we vjúrøt kàrì nvng Rosary mvnì svng mvnnø láng pvng ráà we gø íe. 
AD 1217 nøng Yesu àngmè mariq muqlàng kaq lowe bóy àngni taq nø St. Dominic àngò shvrúng shú mvdò rìkaq mònggvn shvrà vrvm svng dvbùshvng mòngkà dvshvng lvm dvzvŕ yàngà. St. Dominic nø Bologna myuq kaq shi mvtuq dvgvp Rome myuq taq gø mvme nøng vl yàngì we íe. Àngnø dvzvŕ rìò bvnlì døngjá rì taq dvzaq dvkángshì we í lvpat 52 nøng, Bologna myuq taq lvpat béyàngì.