St. Jerome Emiliani

St. Jerome Emiliani
Somaschan Fathers mvdò svng poqpvng yàngà pè St. Jerome Emilianinø Italy móngdàn Vinis myuq 1481 taq shøq yàngà. Àngnø gvzà shvre we cèldu tiqpè gø íyàngì. Tiqni taq mvjàn cøm bøì weí àngsvng dvgá pin mvdò taq kèní tvp kéònø shvmhøngí dùngònø tung taq shvrúng yàngà. Àng we tung taq rungvwe rvtø àngí wá vlé shì yàngì we mvgvm mà shvlawe bvnlì, mvrà shvri svng dvdamò nø nøt tøn nøt língshì ráì. Yesu àngmè mariq kaq vlømshì we nøtí dvtit tvle vjúrøt we jejú kùngà rat we tung vdòng kèní lutshì lún yàngà. We mèpvng angnø gvray kaq apnúngshì lvm tvrà svng shvrúng nøt zángshì ráì nø shvrúng shú zùng svng dìyàngì. Àng vsak 37 nøng taq shvrúng shú vya svng kámshì bøì mèpvng àngtaq vlwe pø zaqshøprì shvngbe svng dvshá mvhøtwe vsvngrì kaq tubum dvbangshì we dvsháza bvnlìrì wálún yàngà. Wewa mvtaq àng taq kèní chøm dvgø màdáwe dvshà vsvngrì, dvratcèrì dvpat chømrì dvgøā òwe nvng cìróngrì waā we bvnlìrì taq dvzaq dvkángshì yàngì. 
1532 taqnø Milan myoq nvng nidó myuqò shvrúng shú mvdò tiq mvdò svng poqpvng yàngà. We mvdò ò tvnù mangárì nø dvshá mvré dvratcèrì svng vsùng lvm vlù vlàng rìkaq paqzí cvnā lvm nvng shvrúng shú zùng cèrì svng tvrà shøl lvm wawe manggá rìtaq dvzaqshì yàngì.
St. Jerome í shvrúng shú rì svng shøn yàngì we taq "kàngpè yesu í nàmaq svng dvshà lvm, nøt cvm lvm, vsvngrì í gur kewe, nøt dvbum shìlvm nvng vsvngrìò yáng mvtàmvm we vhøm lvm dvkám shaqrérì èí nønge, Gvray àng tiqgø taq kèní wa dvshà mvhøt lvm dangrì síngshá shì yàngì we ínìgø bashàrì taqkèní nø 3 dang svng wá shálún yàngshà.
1. Gvray ínø lòngzàpè yesu nvng nøng maq shvngbe svng tiqdø vl dvzvŕ mvyø we rat ya tvrà svng rvcvngònø chutcháng we bvnlì svng wàyàngà.
2. Gvray í nø nøng maq shvngbe svng àng taqkèní dvgá dø gvray mv-vl àng Gvray tiqgø svng wa kámshì ràwe. 
3. Gvray ínø nøngmaq shvngbe svng svmi vdòng kènì jà dø nøngmaq svng dvløt nø dèshèr ìe." Wanø shvngøt dvtú yàngà.
Wedø dvshà mvhøt lvm rì vdòng taq kèní kámnøt taq zøm shvngángshì we ínì nø gvray í ya lvpat mvtaq dvciq lvpat mòngzøl we jejú èzí lúngìe wanø dvkám yàngà.
1537 nøng taq St. Jerome í we móng taq puqwá dvjáng zønli vkøn we rvtø móng vsvngrì kaq tubum dvbangshì we í àng taq gø zínkéò nø lvpat zíshì yàngì.
1928 nøng Svrabín koqkám 12 pèwa pè Pious taqkèní St. Jerome nø dvratcèrì svng roqgvr we shànsheŕ vsvng tiqgø wanø mvsat yàngà.