St. Justin

St. Justin

Nvmlat kámnøt tvrà taq gvsvt vgám dvzaqshì yàngìpè St. Justin nø AD 100 nøng vdòng taq gvlyàngà we Samaritan vsvng tiq gø íe.

Àngnø nøntsun paqzí vdè tiqpè gø íyàngì.àngò lvpvt 30 nøng taq kèní Gvray kámnøt tvrà taq shvre tiqpè wáshì dvbùshvng mòngkà dvshvng lúngà we í kám vsvngrì dvpvt vlíng vpo lúngà. Àngò lvpvt shvngbe nø Gvray paqzí dvng taq wa dvzaq shìnø Gvrayò àngcèrì vzìnglúng lvm dvpvt àng lvpvt shvngbe apnúngshì yàngì.

Gvray kaq mvsháònø mvrà vdòng taq cúnshì we vsvngrì kaq chutcháng lvm nø ngàò bvnlì døngjá íe wanø shønyàngì. Àngò tvnù mvnggá svng jór lún lvm dvpvt Yesu chrituqò tvrà svng tvnùngò we Trypho wa we lìka svng gø vru yàngà. We lòng lìka taq nø nvmlat kám vsvngrì ò noqshì tvrà nvng shvdøkshì yàngì we dang svng vpø shvringò we íe.

Roma myoq taq paqzí zùng tiqlòng poq pvngbøà nø vsvng loksok dvhø taq nøtsùn paqzí vdèrì nvng Gvray tvrà nvng màbóng we kámnønt vlé shì we mvràrì dvpvt vdut yàngà. We mvdòrì taq kèní Crescens wa tøshì we mvnoq mvkám we vsvng tiqpè í St. Justin nvng àng rømnvng 6 pè svng tvpbøà nø upkángshú Rusticus wvl taq sáng núng lvm dvpvt ap bøà.

St. Justin í shønvtàn yàngà we taq ngàtaq kèní kámnøt svng vlíng vpo shì lvm mvl Yesu Christuqò dvshà mvhøt we nvng chutcháng we tvrà taq kèní dvgá dø tvràrì svng ngàí cvndøn lvm mvl wa nø shønyànì. We mèpvng AD 165 nøng koqkám Marcus Aureliusò wvl taq St. Justin nvng àngò zángshúrì nø vgo tutnò nø gønshaq zíshì yàngì.

#rvarawangservice