St. Louis

St. Louis

France móngdànò gvmzø koqkám tiqgø íyàngìwe St. Louis nø AD 1214 nøng taq gvlyàngà. Àngmèí àng svng shvla we rvcángcè tiqgø ílvm dvpat nvng shølshú shvre tiqpè ílvm dvpat shvngøt vjøn yàngà.

Àngkaq svng àngmèí kadvgvp gø dvkámò we nø ngàcèá nàsvng àngcè tiqgø mvdàm àngmè gvlshì we shóngnøt í ni nà svng shóngshønge. Ínìgø ngàcè nàí mvrà gvbà tiqlòng nàléò we mvdàm ngàcè nà vmè ngà hípv:ngø shìvm lòng svng téwa yáng mvyø:nge wanø shøn dvká:mòe wae.

Louis àng vsvk 19 nøng taq koqkámcè Margret nvng døngku shvzøngshì yàngì nø àngcè 11 gø shvzat yàngà. Louis nø àng vsvk 22 nøngwa shì í dvgvp France móngdànò gàmzø koqkám vya svng kámshì yàngì nø móngøp we tvrà taq shvre tiqgø ku vlyàngì we íe.

Àngò lvpat bvnlìrì shvngbe nø gvray àngò dvgùng dvpat nvng móngzøng cèrì vháng vlún lvm dvpat wa dvzaq dvkángshì yàngì we íe. Àngnø dvshá mvhoq vsvngrì kaq tubùm dvbangā we koqkámpè íwe mvtaq vsvngrì kaq mà shvlawe kà kadvgvp gø mvshønwe tiqgø gø íyàngì.

Àngnø shvngømré svng gø gvzà shóngshì nø mvrà vroqshì we dang taqgø tiqnvmsháni dvzaq shì we íe. St. Louis nø àngkaq vtù rawe vsvngrì svng gø shóngnøt gvlshì lúnòe wae. St. Louis svng àngpèí wemóng kaq vtùwe wángzà móng koqkámcè tiqgø svng shvtlvm dvkámò we taqgø vtiqshì nø àngcè tiqgø nø àngmè kà svng wa vtiqshì mvlúnò wanø vtàng yàngà.

St. Louis àngnø AD 1250 nø shvngømré rìò mvjàn tiqlòng taq shølshú wáshì yàngì werat tungtaq gø rúng vdu yàngì. Àng tung taqø rung we rvtø taq kámnøt tvrà taq vjúrøt dvzaq dvkángshì nø tung kèní lutshì ráì wekvt gø France móngdàn svng shi mvlo rvtø shvnshér we rvgaq svnggø vriq yàngà.

St. Louis nø AD 1270 nøng taq lvpat béyàngì nø àngò pvlàcè dang vru yàngà we karu taq "shóngshøng we ngàcèé nà tiqgø taqkèní mvrà gvbà tiqlòng svng vléshì we vzàng kaq kadø íwe dvki vrènø, mvhøt lvm shìwvtrì svng vtoshì rà longe" wanø vru yàngà.

20 PM

Add new comment

2 + 2 =