St. Maria Goretti

St. Maria Goretti

Vlù vlàng rìkaq roqgvr we shvnshér mè Maria Goretti nø AD 1890 nøng Italy móngdàn Netony wamà taq rvmá tvmø wavm we dvshà vsvng tiqrvp taqkèní gvlyàngà. Àng vsvk 9 nøng taqni àngpè nø kaqlì dvjángí shìyàng:ì we rat àngmè memà nvng dàm rvmá chuvmwe taqwa cvmré roq dvbangshì weí cvmré lvpat svng shvle yàngà.

AD 1902 nøng taq Maria Goretti nø chøm taq àng tiqgø wa vlwe rvtø vsvk 18 nøng íwe Alexander wa tøshìwe làngré tiqgø í àng svng mvnyamvm lvm dvkáng shì we vhøm yàngà.

Wedø Maria Goretti svng vréshì ráì kvt àngí wepè svng gvray mvshóngshì we mvwá shìlvm røtním shìwe ínìgø wepèí mvdøng mvdaqni vréshì lvm dvkángshì ráì werat àngnø shagóng svng zíshìlvm tvle ànggøn shaqsvng zíshìlvm høqshaq dvkámshì ráì we rat we ngàshàpèí Maria Goretti dàngkùng svng shvmí yaqònø vtshì yàngì wae.

Welòng dammá rat Maria Goretti nø cìróng svng cìcíshì lvm rúngvmì we ínìgø 24 nari vdòngø ni we ngàshàpè svng mvrà vroqāò we kà vtan bøà mèpvng lvpat béyàngì. Maria Goretti nø àng vsvk 12 nøng taq lvpat béyàngì nø àng svng shvt yàngà pè Alexander gø we mvrà dvpat 30 nøng køp tungtaq rúng yàngì.

Alexander tung taq rungwe rvtø Maria Goretti taqkèní àngsvng shøngran zíyàngà we nø mùngnø vnvpwe nvmbvnrì àngsvngvzíò we shønran svng dvtanā yàngà we rat Alexander gø nøt vlíng vpo shìráì weí àngò mvràrì svng vropā lvm røtním shìyàngì.

Svrabín koqkámpè Pious bat taq Maria Goretti svng shvnshér vsvng tiqgø dang yàngà we ínø àng yáng svng vjúrøtshì vsvngrì kaqgø dalvm nvmik gømlarì gvzà dvtanā yàngà we mvtaq Alexander gø mvrà kèní vlíng vpo lúnò we jejú svng vtoshì lún yàngà we svng mvshøl, kàru bokrì taq yánglúnshìe.